«طريقة الدق والتعذيب الكنّا بنتعرّض ليها خلّتنا نكون ما قادرين نسمع وما نكون مركزين مع حاجة، لكن بتذكّر إنّنا إتحركنا حوالي الساعة 12 وحاجة والشمس كانت سُخنة شديد»
بعد ليالي طويلة من الأرق والتفكير، بدتْ حليمة تحكي القصّة من نقطة وصولها لمعسكر الاحتياطي المركزي (أبو طيرة) بالرغم من إنو احداث مهمّة بدت قبل كدا بكتير. شافت وسمعت وعاشت قبل النقطة دي الآلام والفراق، الموت والفقد، التخلّي المفروض بقوّة السلاح. والوصول لي معسكر (أبو طيرة) كان بمثابة بصيص لضوء آخر النفق، إلا إنّو الواقع في الجنينة كان أقسى من إنّو يسمح لتصورّات النجاة دي بالتحقّق بدون يكون التمن دم الناس وأرواحهم وشعورهم بالكرامة الإنسانية.
حليمة شابة ما متزوجة (25 سنة) كانت ساكنة في مركز إيواء (وزارة التربية والتوجيه) في الجنينة. حاليًا ساكنة في معسكر (أورنق) أو معسكر (أبتنقي) للاجئين في تشاد.
القصة بالنسبة ليها ما بدت في 16 يونيو 2023، لأنّو أيّ زول ساكن في معسكرات النزوح أو مراكز الإيواء مرّ بتاريخ طويل من المعاناة بيرجع لي وقت أبعد من كدا، بسبب الجرايم الإنسانية الاستمرت في تهجير السكان الأصليين في دارفور من حتّة لي حتّة على مدى عقود وأجيال..
لكن التاريخ الجديد ده، 16 يونيو، كانت نقطة تحوّل ونوبة نزوح جديدة خلّتها تعيش في ظروف صعبة ما زالت بتعاني من آثارها النفسية والجسدية والاقتصادية.
«حوالي الساعة واحدة و نص نهارا اتحركنا من معسكر (أبو طيرة) قاصدين تشاد. نحن احتمينا بـ(أبو طيرة) باعتبارو قوّة حكومية، لكن ناس (أبو طيرة) سلّمونا للدعم السريع بعد غشّونا وقالوا لينا في أربعة عربات تابعة للدعم السريع أركبوا معاهم حيأمّنوكم لغاية ما تصلوا.»
الشكوك حول تواطؤ (أبو طيرة) كانت موجودة وبتمشي وبتجي في راس حليمة، لكن حتى بعد سلّموهم لي عربات الدعم السريع كان صعب تصديقها بسبب الخوف، لغاية ما الحقيقة ظهرت وانكشفت علنًا، بالتحديد في منطقة (تشكوري) في الحدود البتفصل بين تشاد والسودان.
«لمّا وصلنا المكان دا، عربات الدعم السريع الكانت مفترض إنها حتأمنّا لغاية نصل تشاد مشتْ قدّامنا، وفجأة، بورانا جات مواتر وعربات دفع رباعي. نزلوا منّها رجال من مليشيات الخلا كانوا لابسين ملكي وفي منّهم لابسين كاكي وكلّهم عندهم شارات وأيّ واحد فيهم لافّي شال في راسو. حاصرونا ووقّفونا تحت شجرة شمال الردمية مباشرةً كان جنبها رهد فيهو موية.»
وقفوهم جنب الرهد دا وضوّقوهم أشكال وألوان مختلفة من التعذيب. «كنا تلاتة مجموعات، لكن وقت جوا لمّونا كلّنا في مجموعة واحدة تحت الشجرة: نسوان وبنات وشفع صغار وبرضو شباب ورجال. لمّونا عشان يعذّبونا وعملوا الحاجة دي بكم طريقة، أوّل بدوا بالدق، بعداك التفتيش (وفي الحقيقة كان تحرش ما تفتيش). الواحد منّهم بيجي كأنو عندو أمانة ختّاها في جسمك. يدخّل يدّو في جسمك مكان ما عجبو ويفتّشك. كنّا خايفين وما بنقدر نقول حاجة ولقوها فرصة عشان يعملوا العايزنّو.»
بعد التفتيش، شفشفوهم وشالوا منّهم أي حاجة، وما كان كفاية بالنسبة ليهم. لدرجة في نسوان وبنات كانن لابسات حلقان واكسسوارات قطعوا ليهن أضنينهن بوحشية وما خلّوا حاجة حتى الستيانات شالوها. أنا ما كنت شايلة معاي حاجة، لكن بالرغم من كدا مسكوني ثبتوني وما وقفوا لمّا لقوا شنطتي فاضية. بعداك دخلّوا يدينهم في صدري وبدوا يهبّشوا فيني.» وبعدّاك بدت مرحلة الإستجواب…
أوّل الأسئلة هو: «إنتو دار شنو؟ دار مساليت ولا دار عرب؟ إنتو عوين مساليت ولا عوين عرب؟»
أسئلة واضح المقصود بيها التمييز على أساس عرقي، وما كان قدّام حليمة والعزّل المحاصرين غير إنّهم يجاوبوا الإجابات الكانوا بيفتكروا إنّها حتحفظ حياتهم، رغم إنو حتى الإجابات دي ما كانت مجدية. حليمة بتواصل، «كنّا بنكضّب ونقول دار عرب وعوين عرب لكن كانوا بيدقّونا في كلّ الأحوال.»
جزء من الاستجواب كان لجمع معلومات عن شخصيات معروفة من الإدارات الأهلية، ولمّا زول يكون ما عارف ويعبّر عن عدم معرفته، «بيقعّدوهو في الشمس ويقولوا ليهو صَنْقِع (أرفع رأسك فوق) لغاية الزول يجيهو نزيف.» ده كلّو كان مصاحب بأكعب الألفاظ والشتايم،«كانوا بيقولوا لينا إنتو عبيد! إنتو حيونات ما بشر! بيسألونا، كنتوا مستنيين شنو؟ وليه ما تقعدوا تموتوا في مكانكم؟»
وبتحكي حليمة بحرقة وألم، عن كيف كانوا بيطلبوا منهم يقيفوا في صف عشان يعاينوا ويتفحّصوا أجسامهم ويشوفوا منو الصحتو البَدَنية كويسة ومنو الصحتو متدهورة. بالنسبة ليهم الصحّة البدنية الكويسة بتعني إنّو الزول دا مرتاح ماديًا، وبالتالي، معناها لو راجل، فهو أكيد عسكري، ولو مرا معناها زوجة أو قريبة عسكري، وبناءً على الحاجة دي بيتعرّضوا للتعذيب الجسدي والنفسي بقدر أكبر من الناس الضعاف والصحتهم متدهورة.
للنساء بصورة خاصة، «كان بيتم تخييرنا بين إنّو يتم الاعتداء علينا جنسيًا ونحن موافقين، أو يتم الاعتداء علينا جنسيًا ونحن بنقاوم. في كل الأحوال، في بنات تم اختطافهن واغتصابهن في مكان ما بعيد من الكنّا قاعدين فيهو.»
قد تبدوا الحاجات دي صعبة على التصور، لكن لزول عاشها ومر بيها العجز هو الشعور المسيطر. «عساكر الدعم السريع كانوا بيتحكموا في مصيرنا بشكل مباشر، بأمر واحد منّهم ممكن نموت أو نحيا. «خلّوهم يتحرّكوا!» دي كانت كفاية إنّو مليشيات الخلا يخلّونا نتحرك بدون أيّ تردّد. وإذا قالوا «ثبّتوهم!» كان مستحيل زول فينا يتحرك خطوة واحدة لقدام.»
كان من الصعب على حليمة إنّها توصّف كمّية الضرر النفسي والجسدي والمادي بعد الحاجات الحصلت دي، وكان ظاهر في شرودها المستمر وهي بتحكي وفي تلعثم كلماتها وهي بتقول «خسرت بيتنا وكل ممتلكاتي في هجمة الجنينة، وبعد (أبو طيرة) غدروا بينا فقدت أيّ حاجة فضّلت، تلفوني وأمانات الناس المسّكوني ليها. الضرر المادي دا بالرغم من إنو كان كبير، لكن ما بيساوي أيّ حاجة من العنف الاتعرّضت ليهو.. إتصبت بطلق ناري وإتحرشوا بي، وسمعت أبشع الألفاظ والمسميات. لي درجة لما كنت بقول ليهم ما تهبشوني ردّهم بيكون: إنتي ما شايفة لونك دا كيف؟ و مفترض نغسّل يدّينا بالصابون بعد هبشناك!»
وبتحكي عن وصولها لمعسكر (أدري) والفصل الجديد من المعاناة مع الغربة، والفقر واختلاف الثقافة واللغة وغياب الحساسيّة الضروريّة لناس زيّها. «وصلت (أدري) وأسعفوني في المستشفى وكان معاي أربعة بنات إتعرضن للاغتصاب. في البداية، ما فهمونا لأنّنا ما بنتكلم نفس اللغة، وبعد فهموا، عاملونا معاملة ما حسّاسة لحالتنا.» كانوا بيشروا ليهم بـ «ديل الإغتصبوهم» أو بسألوا عنّهم كده «وين البنات الإغتصبوهم؟» وفي النهاية، على ضوء المعاملة دي، طلعت حليمة وخلّت المستشفى بسبب الوصم المستمر من الفريق الطبي والعاملين في هناك.
«طلعت من المستشفى ومشيت مخيّم (أدري). ما لاقيت أسرتي لغاية هسا، وما عارفة الحاصل عليهم شنو بعد أحداث (أردمتا). وقت وصلنا مخيّم (أدري) أدونا مشمّعات قالوا لينا أبنوا بيها بيوت. الدنيا كانت خريف، والمشمّع ما كفاية إنّو يحمي زول من المطرة. كنا بنطغّى بيهو بس وبنوم. أدّونا برضو كروت نصرف بيها المواد التموينية، وصرفنا مرة واحدة كانت عبارة عن كَوْرَة عَيش لكل تلاتة نفر.»
القعدة في المخيم مليانة أحداث وأحزان برضو. مرّات الناس بيقعدوا سوا وبيحكوا قصصهم المحزنة. كلّهم بيتشاركوا صعوبة البقاء في الجنينة والطريق لتشاد. «بنحكي عن كنا وين في الجنينة وشفنا شنو. مرّات بنتكلّم عن حياة المخيم الصعبة وعن كيف التشاديين بدقّونا لما نطلع عشان نجيب الحطب أو الموية — لكن ماف زول بيسمع القصص دي غيرنا نحن العايشنها.»
وبالرغم من محاولات منظمات الإغاثة العالمية لإنّها تسعف وتساعد اللاجئين في (أدري)، لكن نتيجة لي نقص التمويل، المساعدات دي غير فعّالة وما بتصل للناس كلّهم. وفي خضم وتصاعد الحوجات الطبية والغذائية، بتروح أصوات حليمة -وغيرها ناس كتار- وقصصهم ما بتتسمع وحكاياتهم بتتنسي.
«مرّة جاتنا جهة قالوا تابعين لي حقوق الإنسان، عملوا معاي أنا شخصيًا مقابلة كانت أشبه بالمقتطفات. وسألوني عن الحصل شنو وحكيت ليهم عن الشفتوا، عن البنات الاغتصبوهن، وعن الناس الماتوا وعن الناس الإتدقوا وعن كل المآسي الكنت حاضراها، وبعدها إختفوا، ما عرفت هم عملوا شنو بالمعلومات الأديتها ليهم ولا شفتهم تاني..»«لسّة مرّات بفكر في الحصل ده كلّو وبسأل نفسي ليه حصل؟ ما كان عندي أي نشاط سياسي، أنا زولة بسيطة وكنت أساسا نازحة، مافي حاجة غير لوني وإنتمائي لقبيلة المساليت ممكن يكون سبب في كل الحصل ده. صعوبة التفكير في الحاجات دي مرات بتحميني النوم وبكون صاحية الليل كلو.»



