في جزو من أدبيّات علم النفس، الفرق بين الألم النفسي والعضوي ما كبير ده اذا بقى موجود أصلًا. في ناس بيمشوا أبعد وبيقولوا إنّو الألم النفسي مرّات أكبر وعواقبو أسوأ كمان. واحدة من أكتر العقابات البيتسخدمها جنس البشر هي استبعاد أحد الأفراد برّة المجموعة الكبيرة. وفي أزمان سابقة، لمّا البشر ما كان عندهم السطوة دي على الكوكب، ده معناهو موت أحمر عديل. في الجنينة، وفي حي (الثورة) تحديدًا، مليشيات الدعم السريع (وبدرجة ما الجيش السوداني) مارست النوعين: التعذيب النفسي والإستبعاد الحرفي من الحياة تمامًا.
إسراء بتقول إنّو «أكتر شعور كعب ممكن يمر بيهو الإنسان، إنّو تحس إنّك مستهدف بلونك وقبيلتك وحتى بلسانك». الحرب بالنسبة لمواطنين دارفور ما حاجة جديدة، لكن الحصلت في أبريل 2023 كانت نوع أكتر حِدّة من السوء.
«وسط خلعة الناس والدخاخين الطالعة من اي حتة، أصعب من المرّات الفاتت. كانت بتجينا أخبار إنّو الاشتباكات صعبة في الأحياء الجنوبية، زي (التضامن) وغيرو، وياهو بطبيعة الحال وصلتنا الاشتباكات في حي (الثورة). مافي زول سِلِم من الهجمات دي، واحساس عدم الأمان ما فارقني نهائي. حسّيت إنّي ممكن أموت في أي لحظة ولّا أكعب كمان.
كلّ الاستهداف كان على أساس عِرْقي تمامًا. الدعم السريع كان بخش البيوت وبفتّش عن المساليت بالتحديد وبصفّينا بدون ما يفكّر مرّتين. الموضوع ممنهج، والمخطّط أكبر بكتير من البتخيّلو الزول. أنا لحدّي حسي ما مصدّقة الحصل ده ولا مُخّي قادر يطلع من الصدمة الحصلتْ لي من أهوال المناظر ووحشية القتل والتعذيب الكان قدامي».
وصف «الكابوس» وصف دقيق استخدمتو إسراء عشان تقدر تعبّر عن بشاعة أفعال الدعم السريع. بالنسبة ليها «الدعم السريع بالنسبة لي، ولي غيري، كان اكبر كابوس صحينا عليهو». بالإضافة لكده، كلّ الشافتو ده بيقول ليها إنّو «الدعم السريع ما براهو، كل القبايل العربية الكانت في الجنينة ولّا الجات من برّة الجنينة كانوا مشاركين في المجزرة دي. حتى شيوخ القبايل دي كانو بقولو لي شبابهم أنو الناس ديل نوبة وعبيد ساي والمفروض نبيدهم ونغتصب الدايرين نغتصبوا ونعمل فيهم الدايرنو. وللأسف، ده الحصل طبعا. الغرض من الهجوم كان التطهير العرقي للمجموعات والقبايل الزنجية الموجودة في غرب دارفور، تحديدًا، المساليت».
شهرين من الحصار كان معناها غياب ابسط مقوّمات الحياة: الموية، والكهرباء، والأكل وغيرو من الحاجات. وفي حين وجود حوجة كبيرة للمساعدات الإنسانية في الجنينة، ممكن تقول ما كان في شي اتقدّم ليهم غير حاجات بسيطة من منظّمة الـ WFP ما كانت بتكفّي أصلًا. الناس كانت بتعتمد على نفسها وتساعد بعض في نقل الموية وفتّيش الأكل.
«في وسط البشاعة دي كلها كنت حاسه إنّو دي النهاية وكان الأمل آخر شي فقدتو بعدما فقدت جزو من أفراد أسرتي، والفِضِل عايش منّهم اغلبو اتصاب، والباقين كانوا مفقودين. كل ممتلكاتي يا اتنهبت يا بقتْ رماد وما فِضِل لي شي، حتى شهاداتي وشقى عمري كلّو راح.
وأنا شخصيًا، لأنّي من المساليت، ولأني منتمية للحركة الشعبية لتحرير السودان شمال، كنتَ مستهدفة. ما لقينا دعم من الشعب السوداني ولا من حاكم إقليم دارفور». التركيز كلّو، بالنسبة لإسراء، كان على «الأحداث الحاصلة في الخرطوم والأزمة البمر بيها إنسان الخرطوم فقط». غياب التغطية الإعلاميّة أدّاها «إحساس بعدم الاهميّة وغياب التعاطف تجاهنا كان سيء جدًا. الواقع بقول لي إنّو قيمة حياتي وحياة غيري من سكان إقليم دارفور ما بتسوى كتير.» وحسب وصفها إنو المقابلات الصحفية الاتعملت معاها قبل كدا في مخيم (أدري) إتحولت لي مقالات بس. فحاولت تاخد الحاجات بيدّها وتوثّق براها بقدر المستطاع الحاجات البتحصل ليها والمرّتْ بيهو.
«لكن التلفون الكنت بستخدمو فقدتو لأنو المليشيات كانوا بينهبوا التلفونات مخصوص عشان يخفوا أيّ أدلّة إتصورتْ أو إتسجّلت».
حتّى وهي من داخل معسكر (أدري) بتحكي القصص دي، بتشوف إنّو «موضوع الامان نسبي بس». حيعني شنو الأمان في وسط غياب الاحتياجات البسيطة؟ (قدّموا ليهم زيت وعيش مرّة واحدة بس)، وحتى الموية «لسّه تحدّي ومن الصعب تتلقي»، ناهيك عن «الأمراض والاسهالات المنتشرة».
حتّى بعد الاستبعاد من المجموعة، الفرد بيحاول يرجع ليها، احتمال يلقى حاجة تخلّيهو إنسان جدير بالبقاء. إسراء بتتمنى «إنّو الناس المتخصّصة في مجال الجرايم الدولية تلتفت للجنينة وتعرف إنّو البحصل ده ما ضرر جانبي بسبب الحرب بين الجيش والدعم السريع، وإنّو البحصل حقيقةً هو جرائم إبادة وتطهير عرقي وانتهاك شنيع للقوانين الدولية بخصوص حقوق المرأة». الجهات دي، بالنسبة لي إسراء المفترض «تحاول تصل للضحايا وتساعدهم وتسمع منّهم وتاخد شهاداتهم».



