كِلنكابي وينو؟
انا اتولدت في 1984 في قرية اسمها مَجمري بولاية غرب دارفور، الوقت داك كان عندنا زراعة في حلالنا ورثناها من أجدادنا، اي زول بزرع في زراعتو بكِلنكاب (حدود) معروفة. لما حصلت المشاكل في 2003 والناس نزحوا، كان وقفنا من الزراعة لفترة لانو ما كان في امن. اها بعد مرت بينا زي كم سنة كدا في الأخير رجعنا زراعتنا تاني، وكنا بنمشيها من المعسكرات وبنجي راجعين، وحتى الجنجويد في جزء منهم بزرعوا في حق الناس، لكن في نهاية 2018 انتهكوا حقنا، ومع اول نزول مطر اتدخلوا في المزارع ولما مشينا اتصدمنا، وكمان كانوا ناس معروفين لكن الزول بكون عندو بندقية وانت ما عندك؛ وانا شخصياً جاري لصق كِلنكابي من الناحية الشرقية دقوه وعملوا وعملوا لحدي مات؛ وانا كمان كانوا دايرين يعملوا معاي نفس الحاجه لكن عصرت على نفسي وجريت للاجراءات الرسمية عن طريق القانون، واستفسرت وعرفت الناس ديل منو لانهم شالوا الزرع بتاعي وانا بالواضح بعرفهم بأسماءهم، ومشيت عملت ليهم عريضة والمجرمين وصلَت ليهم العريضة وبرضو رفضوا يطلعوا؛ فعملت أمر قبض واديتو لقيادات المعسكر، فلمُّـونا في معسكر سيسي شان ما اوديه للشرطة عشان الشغل ده ينتهي هناك؛ فجاطوا كدا وقالوا الزول دا شغلو اتخلط؛ وانا كان عندي شهود عيان يمين وشمال وغرب وجنوب من مزرعتي بأسماءهم وهم برضو حضَّرتهم وشِهدوا، لكن الحكومة عملوا شغلهم بتاع (البَلبلي) والاستهبال ده وقالوا لينا ما تمشوا قدام ونحنا قيادات نحلها هنا داخل قيادة معسكر سيسي، وبإجرامهم دا انا حتى خساراتي بتاعة سنة كاملة انا ماشي مورني وجاي، ونرفع الشهود برضو بوديهم وبجيبهم وبأكلهم وبشربهم كلها كتبتها في لستة شان يدوني حقي فما رجعوها لي.
لما جا الخريف كنت داير ازرع لكن هم تاني عملوا مخالفة، والمرة دي كمان مع اخو الزول بتاع المرة المضت وهو زول عسكري جا بعربيتو فيها دوشكا وقف في الزرع وقال:
خلي اي زول يقول الزرع دا حقو خلي يجيني.
الحصل ده كلو شغل جهل لكن انا حقي ما خليتو وبأي طريقة بحاول اطلعو.
والحاجة دي حصلت لينا كلنا والناس الدخلوا في مزارعهم ديل ما في زول فيهم هسع قاعد يزرع، وانا آخر زول وقفوني وجاري البشرق مني كتلوه عديل والمقتول دا لي هسع ما لقى حقو وزول عمل اجراءات شان حقو يتلقي مافي، والاحداث دي ما بين مزارعين ورعاة وإنما احداث إثنية بين ناس جو من مختلف البلاد، من غرب أفريقيا وجوههم مختلفة من وجوه العرب الزمان جو لدار مساليت والحاجة دي وراها الدولة، الدولة ورا الأحداث دي ودي حاجة واضحة جداً.
بسبب الحاجات دي حالياً عندي كذا سنة اطفالي ما قادر اقريهم؛ وردود الأفعال ورا احداثنا دي ردود متواضعة جداً وما في رد فعل يُـحسب للمسؤلين والشيوخ والإدارات الأهلية، وانا في الحتة دي لا خليت سلطان لا خليت عمدة وورقي من 2018 لهسع 2022؛ بس ما لقيت حقي وما لقيت مساعدة منهم، ولحدي هسع نحن معاناتنا مستمرة. وانت كمظلوم تمشي تقول انا مظلوم وحصل معاي كذا وكذا زول بشتغل بيك مافي، ومن هنا انا اتأكدت انو العدالة ماشة في جانب والسياسة ماشة في جانب آخر، والقوي يأكل الضعيف.
