حق تقرير المصير

في حتة تانية من حي (التضامن)، وفي نفس الوقت الكانت فيهو زينب وأسرتها بيصارعوا أسباب الموت بي أسباب البقاء، كان موسى بيعيش في نفس التجربة، بنفس حدة المشاعر زي الخوف، والغضب والفقد..

«أنا موسى، مشهور ومعروف وسط أهالي حي (التضامن) بالخال، شاب عمري 35 سنة كغيري من الشباب غير المتزوجين بطمح لي تأسيس أسرة رغم إنو في ناس كانوا شايفين إنو طموحي دا أكبر من طموح زول ساكن في مركز إيواء مدرسة (صلاح الدين الأيوبي) وبيعافر كل يوم عشان لقمة الأكل.»

 الخال، زي ما كانوا بنادوهو ناس الحلّة، كان عندو شعبيّة في الحي برغم إنو جاهو كنازح في 2021. وأساسًا إتولد وإتربى وعاش في منطقة (تنقوري) لغاية سنة 2003 المخيفة والإبادات الحصلت فنزح مع أهلو لي مخيم كرندق.

«قعدنا في مخيم (كرندق) 16 سنة قبل نجي حي (التضامن) ونسكن في مركز إيواء (صلاح الدين الأيوبي)، المركز دا مدرسة ساكنين فيها أسر كتيرة وواقعة جنب بيت سلطان المساليت، ولو إنت مسلاتي زيي، دا مكان آمن تعيش فيهو.. كنّا بنفتكر إنو الإدارات الأهلية حتحمينا لو حصلت أي حاجة. إتعودت على حياة النزوح، لكن كنت عايز اتزوج وأستقر وأخلّي المركز». لكن في يوم 24 أبريل، والأيام البعدو، قطعتْ أحلامو دي أصوات الرصاص وصرخات الموت. 

«التجربة ما كانت جديدة علي وعلى كل الساكنين في المركز، لكن الحصل دا كان أصعب من أي حاجة عشناها وشفناها قبل كدا. الموت كان كتير وعشوائي، ريحة الجثث مالية الشوارع، وما كان بقيف، كل يوم عدد الجثث دي بزيد..»

بعد الساعات والأيام الأولى بس من إنسحاب الجيش، اتحرقت معظم مراكز الإيواء والمخيّمات في جنوب الجنينة وبقتْ رماد..

«لمّا الأحداث بقت ماشة بالوتيرة السريعة دي سقت ناس البيت الكبار وودّيتهم الأحياء الآمنة، زي حي (المدارس) وحي (المنصورة). هي زاتها آمنة نسبيا لأنها أحياء شمالية، والمليشيات كانت مركّزة في البداية بس على أحياء الجنوب زي (التضامن) و(الجمارك) – ودّيتهم هناك وأنا بفكّر إنو يمكن ما ألاقيهم تاني. يمكن يموتوا ويمكن انا أموت. ما كنت عارف الحياة مودّيانا وين، بس كنت حاسّي إنو دا الوداع. وأنا مليان بالشعور دا، خلّيتهم هناك ورجعتَ حي (التضامن)، قعدتَ هناك مع شباب زيّي.. مستنّين مصيرنا».

شهرين من الحِصِار، معاها قطعة موية، وشبكة الإتصالات، والأكل. على عكس التصور الشائع، مافي زول كان بيقدر يعيش براهو في الظروف دي، بيقولوا الفقرا اتقسموا النبقة، لكن موسى والمعاهو ما كانوا فقرا بس، كانوا فقراء ومحاصرين بي أسلحة تقيلة وخفيفة.

«كل يوم في الشهرين ديل كان الهجوم بيتجدد بـالسلاح. البحاول يمشي يجيب موية من (وادي كاجا) ولّا من الدونكي في (المنصورة)، بيموت. كلّ يوم – لمدّة شهرين – كان عدد الناس البتموت والمصابين لو ما زاد عن 200 ما بيقل عن 100 شخص. كل يوم كنتَ بفكّر إنو أنا إحتمال اليوم البعدو أكون زايد واحد للأعداد دي، ولا جثة تانية مَرميّة في الشارع».

مع ضيق الخيارات وضعف فرص النجاة، موسى قرّر يمشي في اتّجاه الجنوب لي حي (الجمارك) ومنّها يحاول يمشي تشاد، وزي غيرو ما كان عارف يتوقّع شنو حيحصل في تشاد ولّا في الشارع ليها، لأنّو ماف وسيلة الناس تتواصل بيها مع الناس وتعرف الحاصل شنو، سواء في الطريق أو الوجهة. 

موسى و14 شاب من حي (التضامن)، اتحرّكوا وخلّوا وراهم أهل ما عارفين حصل ليهم شنو. خلّوا بيوتهم وحاجاتهم  وأحلام بسيطة زي حلم موسى في الاستقرار وتأسيس أسرة. كل الشايلينو معاهم هو أمل الوصول لي (أدري). حقيقة إنهم 15 شاب من المساليت كانت براها كفاية لي إنهم يكونوا فريسة لي مسلّحين ما بيفهموا غير منطق الطبنجة والآربجي. 

«مشينا واتوكلنا بس. في الشارع، كنتَ حاسي بالشوط الكبير القطعناهو خطوة خطوة، كأنو لينا أيّام ماشين. وبالرغم من كدا، كنتَ بديت أحس إنّو يمكن نصحى من الكابوس دا في مكان أحسن».

فجأة، ومن حيث لا حيث، وقعتْ جمبهم قذيفة رمت ايّ زول في حتة. سكتتْ تأملات موسى في الماشي والجاي، واتكلّم بدلها صوت الإنفجار، الدخان والغبار ملوا المكان كلّو. عشرة دقايق كاملة مرّتْ لحدّما أي زول نجا من القذيفة قدر يتأكّد هو حي ولّا ميت.

«صحيتْ وعاينتَ للناس المعاي وأي زول فيهم مجدوع في حتة، حسبتَ سبعة نفر منّهم اتصابو، واتنين كان ظاهر إنو اتصابو بجروح خطيرة. ما انتبهت للحاصل معاي إلا لمّا ما قدرت أحرّك يدّي اليمين، بعدها لقيت نفسي اتصبت أنا زاتي بتمنية رايش وجروح في الضهر . كنتَ حاسي إنو دي النهاية».

في اللحظة البيتصاب فيها زول بيتحول بحكم الظروف ديك لي عبء على نفسو وعلى الناس المعاهو، أو ده الممكن يحس بيهو الواحد في اللحظات ديك.

بيواصل موسى إنّو «بديت أحس بالآلام الجسدية وإتبدّد بصيص الأمل ولو كان مجرد تأملات. صاحبي فضل رجعو لي. بيقولوا أيّ زول بيشيل نصيب من إسمو، فَضل شالني في ضهرو مسافات طويلة في الشارع من حي (الجمارك) لغاية تشاد، وأنا بين واعي وغمران ودمي بيدفق – نمشي ونقيف كلّ شويّة عشان نرتاح».

إتجدّد الأمل عند موسى للمرّة التانية لما شاف القوات التشادية بتستقبل الناس وفي عربات إسعاف واقفة ومستعدّة. إتجدّد بطريقة أقوى المرّة دي رغم إنو كان بيغالب الصوت البقول ليهو إنّو بيهضرب، ركبوا الإسعاف وودوهم مستشفى (أدري). لما وصلوا لقوا عدد كبير من المصابين وعدد أكبر من أهلهم مستنين برا المستشفى. 

«ما كنت متوقّع إنّو ممكن ألاقي أصحابي ولا ناس من الحلة تاني. لكن بمعجزة، لاقينا فِرِدنا هناك وورّوني إنّهم لاقوا ناس بيتنا في مخيّم (أدري). دا كان أحلى خبر اسمعو، وحسّيت إنّي محظوظ لأنّو في ناس كتار أسرهم اتشتّت وما عارفنّهم وين وأعداد المفقودين كبيرة.

«قعدت في المستشفى شهر كامل حتى خرّجوني. في فترة الشهر دا أصحابي كانوا كل يوم بيجيبوا لي الأكل والموية والأدوية البحتاج ليها لأنو مستشفى (أدري) فيها نقص الأدوية وخدماتها ناقصة – المصابين كتار ومافي حتى غرف عمليات. أقصى حاجة بيقدرو يقدّموها هي نضافة الجروح. لغاية اللحظة البحكي ليكم فيها القصة دي، أنا لسّة محتاج لعملية جراحيّة».

وبالرغم من حساسية الوضع وعدم تشافيهو الكامل طلع من المستشفى ومشى مخيم (أدري) ولاقى أسرتو هناك. الموضوع كان بالنسبة ليهو زي ما وصّفو «معجزة». كانت اللقيا عاطفية ومليانة دموع وأشواق وأحاديث وأخبار شجية وحزينة.

«فلان الفلاني أبوهو إتفقد، بيت ناس فلان إتحرق، قريبنا الفلاني مات وما اتدفن.. 

وأنا بسمع في الأخبار الحزينة دي كل يوم بفكّر: أنا فقدتَ كل العندي -على قِلّتو- بعد مركز الإيواء اتحرق. كانتْ حاجة صعبة الواحد يقعد ويتذكّر ويحكي هو مَرَّ بشنو، لكن، ومع كل المشاعر دي، بتذكّر بوضوح إنو العمل الجرايم دي كلّها كانو الدعم السريع، والمليشيات المتحالفة معاهو، و(تمازج) -بتواطؤ من الجيش- جهاز الأمن، الشرطة، والإدارات الأهلية الكانو على علم بكل الحاجات الحصلتْ وانسحبوا وما دافعوا عنّنا كمواطنين».

لكن الأفكار دي بتتبدّد سريع لما يعاين ويتأمل شكل الحياة في مخيم (أدري)، مافي إختلافات كبيرة عن شكل الحياة في مركز الإيواء في الجنينة؛ لكنو أصعب. ما عندو بيوت، وموية الشراب ما متوفّرة ولا حتى الأكل. معافرة شديدة عشان الواحد يعيش بس.

«في البداية كانت في منظمة وزّعت لينا مواد تموينية: كل 4 نفر في صحن عيش. رغم إنّها ما منطقيّة، لكن هسّا مشى شهر بدون أيّ إغاثات جديدة. وللأسف لسّه الموت ورانا: قبل كم يوم قريبتي ماتت بالحصبة. الخبر دا كان مخيف ومحزن وخلّاني أفكر نحن نجينا من الجنجويد بي أعجوبة لكن هل حنقدر ننجوا من الجوع والعطش والمرض؟ 

«أنا كموسى بعد ما عشت تجربتين نزوح وتجربة لجوء، وما بينهم إصابات وخسائر مادية وبشرية، بقيت ما قادر أشوف غير الإنفصال كإجابة لسؤال: كيف الحق يرجع؟ أنا واحد من الناس البينادو بي حق تقرير المصير للأقليم، لأنّو الحكومة السودانية فشلتْ في إدارة الإقليم وحماية أهلو على مدار التاريخ، بل كانت هي المفتعلة لإبادات جماعية للسكان الأصليين أصحاب الأرض والحواكير؛ ودا كلو طمع في الثروات المعدنية الكتيرة الموجودة في أراضي دارفور».

ممكن ما نكون عارفين هل رغبة موسى في تكوين أسرة لسّة موجودة، لكن العارفينّو تمامًا، مع جروحو ووضعو السيّء في مخيّم (أدري)، إنّو قائمة أولياتو اختلفتْ تمامًا هسّا، وما معروف لمتين بالضبط. 

Leave a Comment

Your email address will not be published. Required fields are marked *

Scroll to Top