أسئلة بلا إجابات

أم ضوينات

كيف ممكن تعيش في بيتك والموت حيداهمك فيهو بدون يدق الباب؟ كيف ممكن تطلع منّو وتعيش مع المجهول؟ كيف تقعد في حِلّة نص سكانها اتقتلوا والباقين طلعوا وخلّوا بيوتهم وراهم عشان خايفين على حياتهم؟ دي أسئلة ما إتوقع  معاوية في يوم إنّو حيسألها لي نفسو لأنو حَيّهم الساكنين فيهو (أم ضوينات) حي هادي وملان حياة وسكّانو مسالمين. 

«(أم ضوينات) واقع في وحدة إدارية اسمها شرق الوادي في الجنينة. عِشتَ فيهو 28 سنة بدون متاعب، إلا بس لما يكون في هجوم ولا اقتتال في إقليم دارفور كلو. ربينا في الحي دا، وإحتضنا في حرب 2003 وهجمات 2016، 2017، 2018، 2021 و2022. كانت كلّها أوقات فيها أزمات صعبة وخسرنا فيها كتير، صمدنا فيها وصمدتْ معانا أم ضوينات.» لكن أيّا كانت صعوبة الأزمة وبشاعة الجرائم والإنتهاكات، معاوية مؤمن إنّو ماف حاجة أكعب من الحصل ليهم في 24 أبريل 2023.

«أوّل ما الحرب قامت في الخرطوم، حصلتْ هجمات في (فوربنقة) و(بيضة)، ماف زول اتكلّم عنّها ولا جاب سِيرتها في الأخبار. الهدوء بعد الهجمات دي هدوء كان ما قبل الإبادات، لكن ما كان في زول، بعد ده، متوقّع إنّو الجنينة تتحوّل لمسرح جريمة كبير على مرأى ومسمع الحكومة والإعلام والعالم الإتعاموا عن القاعد يحصل لينا.» الشباب في ولاية الجنينة، بعد ما شافوا الشافوهو، قرّروا إنّهم يتحرّكوا عشان يتداركوا الموقف. 

«كان في مجهودات من شباب الولاية إنو يقيفوا في وش الحرب ويمنعوا إنّو الوضع يصل مرحلة التفجُّر. بتذكّر إنّو اتعَمَلتْ مبادرة (معًا من أجل استقرار الجنينة) شاركوا فيها شباب الجنينة النشيطين وكان معاهم الوالي والإدارات الأهلية».

لكن جوّة الجنينة الأخبار كانت بتنتشر بين الناس وفي الحلّة. فشلتْ محاولة حفظ الأمن في الجنينة بي الاشتباك بين الجيش والدعم السريع يوم 24 أبريل وموت الآلاف بعدو.

«جزء من التخطيط كان بيحصل في (أم ضوينات)، عشان كدا كنّا قادرين نشوف الهجوم والحصار الحصل كلّو من البداية. المليشيات دي جات من كلّ الإتجاهات: من الضعين، الفاشر،  وزالنجي. شفناهم وهم داخلين وشفناهم وهم بينهبوا السوق والمؤسّسات والمخازن والمستشفيات. نهبوا كلّ مكاتب الإغاثات بتاعة الـ WFP، كانوا بيخشّوها مع الدعم السريع بحُجّة إنّو عايزين يأمّنوها من السرقة، لكن في الحقيقة هم السرقوها. بعد نشّفوا كلّ المخازن وشالوا أيّ حاجة ممكن تتشال، بدوا يستهدفوا الشخصيّات المهمّة: الدكاترة، والأساتذة، والمحاميّين، وخصوصًا، السياسيين والناشطين في موضوع حقوق الإنسان».

الواحد بيتوقّع، في لحظات زي دي، من قوّات بتقول إنّها واقفة مع الشعب السوداني وتحديدًا مواطني إقليم دارفور إنهّا تحاول تنظّم مسألة توزيع الموارد المتاحة، وتتعاون مع كلّ الجهات، منظّمات، إدارات أهليّة، أو شباب خايفين على بلدهم، عشان يهدّوا الوضع ويحفظوا سلامة المواطنين. ليه، طيّب، بدوا يستهدفوا الناس ديل بالتحديد؟

«أنا بفتكر إنّو السبب هو خوفهم من إنّو الناس المتعلّمين والمثقّفين يكتبوا عن الجرائم دي ويوثّقوها، ودا نفس السبب الخلّاهم أوّل ما يلقوا زول [في طريقهم] يشيلوا تلفونو أوّل بعدها يقرّروا حيعملوا معاهو شنو». فعلًا، زي ما قال معاوية، حاجات زي «السرقة والنهب، الاغتيالات والتعتيم الإعلامي المقصود، الإبادات الجماعية، والاغتصاب» حتخلّيهم عرضة لضغوطات اعلاميّة وسياسيّة كبيرة لو كل طلعتْ القصص دي للناس. 

ماف حاجة كانت بتميّز (أم ضوينات) عن باقي أحياء الجنينة، كل الناس عاشوا في نفس الحصار: أزمة أكل وموية وأدوية. بالإضافة طبعًا للخوف والهلع اللي ممكن يحصل في أيّ لحظة. معاوية بيشهد إنّو مليشيّات الدعم السريع «كانوا بيخشّوا لينا في البيوت مرّة بحُجّة إنّو في قنّاصة في راس البيت ومرة بحُجّة إنو في ذخيرة جاتهم من اتّجاه البيت ولازم يفتّشوهو. الحقيقة إنّو التفتيش دا كان إرهاب بس وماف أيّ أسلحة. كانوا بيلقوها فرصة عشان يسمّعونا أكعب الإساءات – إساءات كلّها عنصرية وقبلية». 

وفي واحدة من أبشع الجرايم الشافها معاويّة شخصيًّا بقول فيها إنّو «كان في واحد من أولاد الحلة إسمو أحمد جاء ماشي في الشارع لقوهو ناس من المليشيات وهُم بينهبوا في بيت. وقّفوهو وسألوهو من سيد البيت، ولمّا قال ليهم ما بعرفوا ساقوهو جوا قتلوهو وحرقوا البيت وخلوهو هناك [في البيت المحروق]».

ضاق الوضع وبقى ماشي للأكعب، وكلّما ضاق أكتر، كانت (أم ضوينات) بتفضى من الناس. هنا كانت بتراود معاوية أسئلة زي «هل نطلع نلحق باقي الناس ونمشي تشاد؟ هناك المستنينا شنو؟ هل حنقدر نعيش هناك؟ هل حنقدر نوصل أساسا؟» 

الآن، معاوية متواجد في مخيّم (أورنق) في تشاد بعد فترة من المعاناة في الجنينة وفي الشارع لي تشاد. «الحالة أحسن يعني من الجنينة لكن لسّه مصيرنا مجهول ولسّه ما عارفين حنصمد في ظروف المخيم القاسية دي لمتين. ظروف قاسية لدرجة إنّو لو في زول عيان ولّا مصاب إلا نودّيهو مخيّم (أدري)، [على] مسافة 50 كيلو مننا، لأنّو هنا مافي مراكز ولا عيادات وحتى لما نمشي (أدري) ماف فرق كبير، المصابين بيحوّلوهم لأماكن تانية لأنّو مافي عمليّات في أدري برضو.

«الأكل في تلتلة شديدة، وفي تدخّل من منظّمات إغاثة لكن تدخّل بطيء وما بيصل الناس كلّها. أنا مثلا أخدتَ مؤن غذائية في أوّل شهرين، لكن تاني ماشين ومتوكّلين على الله بس».

هل جيّتهم لتشاد كانت غلط؟ سؤال بيتردّد في راس معاوية بسبب صعوبة حياة المخيّمات، خصوصا على النسوان والشفّع، والوضع الأمني الما مستقر خلّا ناس كتار يسألوا نفسهم السؤال دا. 

«لكن كان ممكن نعمل شنو؟ وكان ممكن نمشي وين؟ والآن نعمل شنو ونمشي وين؟ هل بيوتنا حترجع؟»  دي كلّها أسئلة بدون إجابات، بيسألوها لنفسهم الناس العايشة في المخيّمات دي لأنو ماف زول عندو إجابات، ولأنّهم حاسّين إنّو أصواتهم ما مسموعة. 

«الحاجة دي خلّتني أفكر في الحرب العالمية الأولى والتانية، في حرب أوكرانيا وروسيا وفي كل الحروب البتلقى إهتمام من المجتمع الدولي والإقليمي، وطوّالي بيجيني في راسي سؤال جديد: هل دم الإنسان السوداني ما بنفس أهمية دم الإنسان الأوروبي والعربي؟»

Leave a Comment

Your email address will not be published. Required fields are marked *

Scroll to Top