حصار غرب دارفور- التايملاين

مقدمة ضرورية (قبل الفأس تقع في الراس)

التقويم ده بيستعرض الإنتهاكات وأحداث العنف الحصلت في ولاية غرب دارفور من بدايتها في يوم ٢٤ ابريل ٢٠٢٣ ولحدي لحظة سقوط الولاية في يد قوات الدعم السريع والمليشيات المناصرة ليها في يوم ٢٢ يونيو ٢٠٢٣. وعشان نقدر نجمع الأحداث والإنتهاكات دي في الشكل ده، اعتمدنا على إفادات بعض الناجين والناجيات من حصار غرب دارفور وبرضو استخدمنا أدوات تانية زي الرصد والتحقق من المعلومات عن طريق استخدام المصادر المفتوحة. ده خلانا نقدر نتحرى الدقة والموثوقية في الشهادات الجمعناها من الناجين والناجيات وبرضو نتأكد من صحة المحتوى والمعلومات الموجودة في الميديا عن الحصل بعد ٢٤ أبريل في غرب دارفور.  

بعد ما إشتعلت الحرب في الخرطوم يوم ١٥ ابريل ٢٠٢٣، في ولاية غرب دارفور وتحديدًا مدينة الجنينة احتل الدعم السريع على مطار الجنينة وكان في حظر تجوال في المدينة بسبب هجوم كان حصل في فوربرنقا، الحركة كانت ممنوعة جوة الجنينة بعد الساعة ٦ مساءً وصدر قرار من حكومة الولاية إنو الأماكن العامة زي جمبات الشاي مثلًا تقيف بعد المغرب. يومي ١٨ و ١٩ أبريل بدأ يكون في تجمعات من مجموعات عربية حول مدينة الجنينة في الإتجاه الشرقي من المدينة اللي هو إتجاه منطقة أم دوين، و في تجمعات في الإتجاه الجنوبي اللي هو إتجاه منطقة مولي و قوكر؛ و كل مداخل الجنينة.  بعدها وما بين ١٥-١٩ أبريل حصلت حادثة اغتيال صاحب طرمبة وقود في الجنينة في معسكر كريندنق للنازحين، وتم قتله ومعاهو ولدو وولد اخوه. الجهات الأمنية ما قدرت تصل للأشخاص الإرتكبوا الجريمة دي وبسبب الحادثة دي الجو بدأ يتوتر اكتر في الجنينة وبدت الناس تتكلم عن إنو في كتمة جايه خصوصًا مع اخبار المليشيات المتجمعة في حدود المدينة. بدأ يكون في تحرك لحكومة الولاية وحركات الكفاح المسلح وخصوصًا التحالف السوداني.

 يوم ٢٠ أبريل سلطان المساليت طلع كم بيان بيدعو فيهو الناس أنو مفترض تحتكم لصوت العقل وانو ما تحصل اي أحداث عنف، بعد داك اتعملت مبادرة شبابية وضمت أطياف مختلفة من الناس وكان فيها الإدارة الأهلية وحاولوا فيها الشباب انهم يعملو نفس تجربة الضعين. تمت دعوة السلطان وكل القيادات وأعيان المنطقة، جزء من الشباب الفاعلين في المجتمع المدني،  اجسام نسوية، ومركز دراسات السلام بتاع جامعة الجنينة. الحاجه دي إترتب ليها يوم ٢٢ وفي يوم ٢٣ ابريل قام اجتماع كبير استمر لأكثر من ٦ ساعات؛ كان فيهو حضور سلطان المساليت و فيهو الأمير اللي هو بيمثل مجموعات القبائل العربية، و إتفقوا في الإجتماع ده أنو الحاجة البتحصل في الخرطوم دي ما مفترض تنتقل للجنينة. الإجتماع طلع بأنو إتكوَنت لجنة تسيرية عشان تشرف على انها تفتح سوق الجنينة اللي إتقفل بسبب التوترات وحظر التجوال، وينعقد مؤتمر صحفي، وبرضو تم التواصل مع مدير شرطة الولاية والتزم بانو يرسل قوات تأمّن السوق. طلع البيان بتاع الاجتماع دا في نفس اليوم حوالي الساعه ٨ مساء وتمت الدعوة لإفطار جماعي يضم كل مكونات الجنينة ويكون تاني يوم اللهو ٢٤ أبريل في سوق الجنينة. وتم اقتراح انو تتكون لجنه فيها السلطان و فيها الأمير عشان يمشوا يخاطبوا القائد بتاع الدعم السريع والقائد بتاع الجيش انو ما يحصل اشتباك بين الجيش والدعم السريع في الجنينة. رغم ده كلو، للأسف صحوا أهل الجنينة يوم  ٢٤ ابريل على أصوات الاشتباك والموت والخراب. 

٢٤ – ٢٧ أبريل ٢٠٢٣

في صباح يوم ٢٤ أبريل ٢٠٢٣، صحوا الناس على أصوات ذخيرة في بعض الأحياء الجنوبية من الجنينة، بعض الروايات بتقول انو الجيش اتحرك من الحامية في اردمتا في اتجاه مقر القوات المشتركة السودانية التشادية بغرض استلام عربات تابعة لقوات حماية المدنيين في المقر وفي طريق رجعتهم، البمر بمعسكر الدعم السريع، بدأ الدعم السريع في إطلاق الرصاص عليهم ظناً منهم انو الجيش هاجم عليهم، وبدأ الاقتتال الانتهى بانسحاب قوات الجيش لمقر الفرقة ال ١٥ مشاة وهجوم الدعم السريع على الأحياء الجنوبية من الجنينة، الرواية التانية بتقول انو الجيش قصد الهجوم على معسكر الدعم السريع، وفي رواية بتقول انو الاقتتال بدا لمن الجيش وقع في كمين نصبتو قوات الدعم السريع،  في كل الحالات، المدنيين من سكان الأحياء الجنوبية (الغالبيتهم من المساليت) لقو روحهم تحت وابل من الرصاص ادى لمقتل ٩٦ شخص وجرح ١١٠. حسب افادة واحد من الناجين وهو كان ساكن حي المنصورة قريب من مقر الدعم السريع قال: “في صبيحة ٢٤ أبريل سمعنا أصوات ذخيرة قريب من مقر الدعم السريع وبعد دقائق تم الهجوم على حينا. جرينا وطلعنا من البيت مشينا حي المدارس ما رجعنا البيت تاني لحدي ما قدرنا نصل في النهاية أدري”. واضاف إنو هو كان واحد من الكوادر الطبية في مركز الصداقة الساكنين فيهو الناس النزحو من أحياء الجبل و كريندنق وانهم كانوا بيستقبلوا يوميًا أكثر من مية جريح وحوالي سبعين قتيل في الوقت الكان كل المراكز الصحية والمستشفيات والصيدليات مدمرة، وانو الدانات كانت بتنضرب على الأسر وبتستهدف النساء والأطفال. 

اتواصلت الهجمات على الأحياء الجنوبية واتوسعت خلال الأيام التلاتة دي وضمت أحياء: التضامن، الثورة، الجبل، البحيرة، المنصورة، المجلس، المدارس، والجمارك وسوق الجنينة الكبير التم نهب موارده بصورة ممنهجة وعدد من مراكز إيواء النازحين الأُحرقت بالكامل، راح ضحية الأحداث دي في يوم ٢٥ ويوم ٢٧ قرابة ال ٤٠٠ و ٤٥٠ وجُرح ٦٠٠، ٣٠٣ في الايام دي علي التوالي.

١٢ مايو ٢٠٢٣

إتجددت الاشتباكات في أحياء التضامن، الثورة، الجبل، المنصورة زهور، المدارس، المجلس، والبحيرة. واعداد الناس الإتقتلوا غير مؤكدة لكن تقدر بالمئات.

١٣ مايو ٢٠٢٣

طلعت قوة من قيادة الجيش بأردمتا و قدرت بتلاتة دبابات و سبعة عربة كانت متجهة نحو أمانة الحكومة بحي الجمارك و إشتبكت مع المليشيات في حي النسيم و إتضررو جزء من مواطني حي النسيم وبعض الأحياء الشمالية بسبب تدوين الجيش و إتقتل ٢١ من أفراد الجيش. 

١٧ مايو ٢٠٢٣

تم الإعتداء على شخصين واحد منهم بنتمي لقبيلة التاما و الاخر للقبائل العربية في منطقة تندلتي الواقعة في الحدود التشادية و بسببو حصلت ردَة فعل من قبيلة التاما والمجموعات العربية وقامو بتهجير المساليت من المنطقة بالكامل.

٢١ مايو ٢٠٢٣

في ٢١ مايو ٢٠٢٣ تم حرق مركز إيواء وزارة الزراعة معسكر مدينة الحجاج وجزء من حي المنصورة.

٢٨ مايو ٢٠٢٣

في اليوم دا قامت قوات الدعم السريع والمليشيات المتحالفة معاها بحرق منطقة مستري، واتقتل ما يقارب الـ ٦٠٠  شخص، وجرح ٣٠٠ من المساليت وفر بقية سكان مستري البالغ عددهم اكثر ٤٥ ألف.

٧-٩ يونيو ٢٠٢٣

في اليوم ده حصلت هجمات بمدافع ثقيلة وقذائف على أحياء التضامن، الثورة، الجبل، المنصورة ، المدارس والمجلس وكان التركيز على حي الزهور ومن اليوم داك بدت تصفيات أعيان المساليت بشكل أوسع وممنهج و بدت تطلع قوائم بتاعت تصفيات، وتم فيها قتل جماعي وحرق وقتل أسر بأكملها وكانت في جثث كتيرة في الشوارع والبيوت الناس ما قدروا يدفنوها. 

١٢ يونيو ٢٠٢٣

في احياء الجمارك والمدارس رمت قوات الدعم السريع اكتر من ٣٦ قذيفة في مناطق مزدحمة بالنازحين ادت لي مقتل ٢٠ شخص وجرح العشرات. 

١٤ يونيو ٢٠٢٣

في مدينة الجنينة عاصمة ولاية غرب دارفور تم اعتقال والي الولاية في مقر قوات الإحتياطي المركزي، وقامت قوات الدعم السريع والمليشيات المتحالفة معاها باغتيال والي غرب دارفور خميس ابكر.

١٥ يونيو ٢٠٢٣

بعد مقتل الوالي خميس ابكر حاول عدد كبير من المواطنين انهم يهربوا الى أردمتا مكان تواجد قيادة الجيش و الجزء الاخر الى منطقة أدري التشادية’ و لكن قوات من الدعم السريع والمليشيات المتحالفة معاها أطلقت وابل من الرصاص على بعض المواطنين الفارين من الجنينة وقتلت الالاف من المواطنين و عدد كبير القدروا ينجوا من الرصاص، ماتوا غرقاً في وادي كجا، و تعرض جزء منهم للتعذيب و الذبح والحرق. 

٢٠ – ٢١ يونيو ٢٠٢٣

في إحاطة قدمها المدعي العام للمحكمة الجنائية الدولية أمام الأمم المتحدة في ١٣ يوليو ٢٠٢٣، أعلن المدعي العام كريم خان فتح تحقيق بشأن المزاعم بارتكاب جرائم حرب في سياق الحرب الدائرة في السودان، وخاصة الحصل في مدينة الجنينة بولاية غرب دارفور. وأشار لي تقرير مكتب الأمم المتحدة لحقوق الإنسان واللي أفاد بتلقي معلومات موثوقة بتفيد بدفن ما لا يقل عن ٨٧ شخص من قبيلة المساليت واللي قتلتهم قوات الدعم السريع والمليشيات المناصرة ليها في دارفور في مقابر جماعية خارج مدينة الجنينة (قريب من مبنى الاحتياطي المركزي غرب الجنينة).

٢٢ يونيو ٢٠٢٣

بعد أكثر من شهرين من الحصار المستمر و الإنتهاكات والفظائع سقطت مدينة الجنينة بالكامل في قبضة الدعم السريع. 

٢٧ يونيو ٢٠٢٣

في يوم ٢٧ يونيو قوات الدعم دخلت معسكر مورني في محلية كرينك وقامت القوات دي بنهب البيوت وممتلكات المواطنين وتهجيرهم، واحرقت المعسكر بالكامل.

٢٤ يوليو ٢٠٢٣

هيومن رايتس ووتش في أغسطس ٢٠٢٣ قالت انو صور الأقمار الاصطناعية أظهرت دمار هائل بسبب الحرائق القامت في قرية سربا واللي بتقع على بعد حوالي ٥٠ لي ٧٠ كيلو متر من مدينة الجنينة. واظهرت بيانات الكشف عن الحرائق التابع “لناسا” حرائق نشطه فوق سربا في ٢٧ ٢٨ يوليو ٢٠٢٣ وظهر في الصور عالية الدقة الاتأخدت في ٢٩ يوليو انو كل المناطق السكنية في القرية اتأثرت بالحريق ده. وعلى حسب افادات هيئة محامي دارفور الهجمات على سربا بدأت في ٢٤ يوليو ٢٠٢٣ واستمرت كم يوم، وراح ضحيتها قريب ٢٠٠ شخص بينهم زعماء ادارات اهلية، اضافة لانو تم نهب البيوت وحرقها بالكامل.

أغسطس ٢٠٢٣

حسب شهادات بعض الناجين والناجيات تم حرق معسكرات الحجاج، اذرني والغابات في أغسطس ٢٠٢٣

أكتوبر ٢٠٢٣

حسب إفادات بعض الشهود قامت قوات الدعم السريع في أكتوبر ٢٠٢٣ بسرقة سقوف المنازل”الزنك” في مستري، وحرقت البيوت الما قدرت تسرق منها حاجه. وأغلب سكان القرية كانوا لجأوا اصلا في الهجوم الاول الحصل في اواخر مايو وبدايات يونيو ٢٠٢٣،  واللي تم فيهو حرق جزء من القرية. وحسب تقرير صادر عن رويترز بقول انو صور الاقمار الاصطناعية التقطت حجم الدمار الحصل للبنية التحتية في مستري يقدر بحوالي ١.٨ كيلومتر، يعني مساحة بتتقدر بحوالي ٢٥٠ ملعب كرة قدم. 

١-٢ نوفمبر ٢٠٢٣

مع بداية نوفمبر ٢٠٢٣،  طلعت نداءات استغاثة من مواطني الجنينة بتحذًّر من سقوط الحامية ١٥ اللي كانوا محتمين بيها في أردمتا. وده كان بعد استيلاء الدعم السريع على زالنجي ونيالا في ولايتي وسط وجنوب دارفور. إلا أنو جات تطمينات للمواطنين بأنو مفاوضات سلام جدة مستمرة وده ما حصل طبعا والمفاوضات وقفت،  وبرضو طلع بيان أصدرته قوات الدعم السريع واللي نفت فيهو أي نية لمهاجمة الجنينة أو أي جزء منها وأشار البيان أنو عندهم حلول تانية غير الحرب وأنهم ما حيخلوا سكان الجنينة يعيشوا تجربة الحرب مرة تانية. بس المواطنين كانت مخاوفهم في محلها، وفي نفس اليوم تجدد القتال بين الجيش والدعم السريع. أطلقت قوات الدعم السريع تحذيرات للجيش بأنو يخلي الحامية إلا أنو الجيش رفض انو يخلي الحامية لحدي ما تتوفر ليهو الضمانات الكافية للخروج بأمان. قامت قوات الدعم السريع بتحريض القبائل العربية لتقوم بقتل قائد الحامية بحجة انو قتل عدد من الاشخاص المنتمين ليهم. وده خلا القتال يتجدد مرة ثانية وخلف العديد من الضحايا المدنيين اللي ما تم التعرف على أعدادهم وقتها،  ونزح الكثيرين وتم قطع شبكة الإتصالات مرة أخرى في المدينة.

 ٣-٥ نوفمبر ٢٠٢٣

بداية من ٣ نوفمبر ٢٠٢٣ بدا الدعم السريع يشن هجمات ضد الفرقة ١٥ مشاة التابعة للجيش وبعد تلاتة أيام من المواجهات و تحديدا في يوم ٤ و ٥ احتل الدعم السريع الفرقة ١٥ مشاة واستباح أحياء اردمتا، والجيش انسحب غرباً لتشاد. الهجوم دا انتهى بمقتل ٢٠٠٠ شخص وجرح ٨٠٠ وفقدان ٣٧٠. وقالت “اوشا” انو قوات الدعم السريع اعدمت ٦٦ رجل من المساليت وكانت بتحتجز ٢٠٠ من الرجال والأطفال في ثلاثة مواقع في اردمتا.

نوفمبر ٢٠٢٣ – فبراير٢٠٢٤ 

في وقت لاحق من بداية الهجوم اتبعت قوات الدعم السريع والمليشيات المتحالفه معاها نفس سياسة الحصار التي فرضتها في الأحياء الجنوبية للجنينة، قامت بإغلاق الحدود بين مدينة كريندق واللي بيستخدمها الفارين من أردمتا عشان يعبروا لتشاد، عشان تمنعهم من الوصول لمكان آمن. بعدها سيطر الدعم السريع والمليشيات المتحالفة معاهو على غرب دارفور بالكامل ومع انقطاع شبكات الاتصال والانترنت والتعتيم الإعلامي، أصبح من الصعب الوصول لما يحدث حاليا في غرب دارفور بس من المؤكد انو في مواطنين مازالوا موجودين في ظل الظروف المعقدة دي. 

Leave a Comment

Your email address will not be published. Required fields are marked *

Scroll to Top