الوضع الإنساني في معسكرات تشاد

مواطنين غرب دارفور الفارين من الحرب والبالغ عددهم ٣٠٠ ألف حسب تقديرات الأمم المتحدة بتتمركز غالبيتهم في معسكرين للاجئين في شرق تشاد؛ معسكر ادري ومعسكر ارونق او “اديكونق” وهو معسكر تم إنشاؤه حديثاً عشان يستوعب اللاجئين الفارين من الحرب في السودان، وحسب الإحصاءات معسكر ارونق براهو فيهو ما يقارب ٤٥ الف لاجئ ولاجئة سودانية و ٨٥% منهم من النساء والأطفال وده لانو اغلب الرجال إما سافروا لمناطق تانية بعيدة عن المعسكر باحثين عن لقمة العيش، أو لأنهم اصلاً ما قدروا يوصلوا المعسكر ولقو حتفهم أثناء الحرب. 

الوضع الإنساني في المعسكرات سيء جداً من كل النواحي، وعلى حسب الإفادات القدموها لينا بعض اللاجئين في معسكر ادري، ماف ابار كافية للحصول على الموية الصالحة للشراب والحل الوحيد انو الناس تشتري الموية بأسعار غالية.

في أكتوبر ٢٠٢٣، منظمة أطباء بلا حدود قالت انو احيانا في معسكر ادري حصة ٢٠٠ شخص من الموية بتكون حوالي ٦ و٧ لتر فقط يوميا، في حين انو معيار الطوارئ الموصى بيهو مفروض يكون ٢٠ لتر يومياً. وفي معسكر ارونق، النساء بضطرن يقيفن في صفوف الموية من الساعة ٢ صباحا لانو الموية عادة بتجي ما بين ٢ – ٥ صباحاً وممكن بعد وقفة ساعات طويلة ما يلقوا موية. وبسبب تلوث مياه الشرب من آثار فصل الخريف وانتشار الذباب والبعوض بتعاني المعسكرات من انتشار عدد من الأمراض المعدية زي الملاريا والاسهالات المائية؛ والأطفال بالأخص هم اكثر فئة بتعاني من أمراض زي الحصبة والملاريا وبكون الوصول للعلاج صعب نسبة لعدم توفر الموارد الطبية والكوادر العاملة في المجال الصحي. حسب “بي بي سي” في ١٧ أكتوبر ٢٠٢٣ لاقى ٤٢ سوداني حتفهم في تشاد بسبب الأمراض ونقص الماء والغذاء.

اللاجئين في تشاد بيعانوا من حوادث عنف جسدي واعتداءات بسبب الظروف المعيشية السيئة العايشنها، وبالأخص النساء والفتيات؛ لأنهن بيضطرن يشتغلن في الاسواق ويجيبن الحطب وده بيعرضن للضرب والشتم من قبل القوات والمواطنين التشاديين على حسب إفادات بعض الشهود. وعلى حسب تقرير صادر عن منتدى نساء دارفور بيقول انو اللاجئات السودانيات مابيقدرن يطلعن من المعسكرات لقضاء حاجتن خوفا من الأغتصابات والعنف الجنسي اللي ممكن يتعرضن ليهو في حالة خروجهن؛ وبرضو التقرير أشار إلى تزايد حالات العنف الأسري داخل المعسكرات، ونشوء ظاهرة خطيرة وهي وجود أطفال سودانيين متسولين في أسواق القرى المجاورة لمخيمات اللاجئين. زادت معاناة النساء بسبب آثار الحرب والأوضاع الغير انسانية الاتختن فيها، وما فقدن ازواجهن بس ولكن فقدن اطفالهن برضو بسبب نقص الغذاء والماء والعلاج. في واحدة من المقابلات العملناها مع أحد اللاجئين في تشاد حكي لينا عن الأطفال ومعاناتهم مع اللجوء وقال: “أنا دا شخصيا حسبت زي ٣٥ طفل ماتوا من سوء التغذية”. وأشارت منظمة الأمم المتحدة للطفولة في أكثر من تقرير انو أطفال السودان بيعانوا من تفاقم الأوضاع الإنسانية، وبحلول أكتوبر ٢٠٢٣ قدرت منظمة يونسيف أن ٦.٥ مليون طفل هم خارج النظام التعليمي بسبب الحرب.

في نوفمبر الماضي بدت الوكالات اللي بتقدم المساعدات الانسانية في السودان تلوح بإيقاف المساعدات لعدم كفاية التمويل. صندوق الأمم المتحدة للطعام قال انو بيحتاج ٢٥ مليون دولار شهرياً عشان يقدر يقدم الكان بيقدمه للمستفيدين البالغ عددهم ٨٠٠ ألف لاجئ في شرق تشاد، وقال انو المساعدات حتقيف في يناير إذا ما تم زيادة التمويل. منظمة الأمم المتحدة للأغذية والزراعة برضو قالت أنو الحبوب اللي بتقدمها وبيستفيد منها ما بين ١٣- ١٩ مليون مزارع حتنخفض كميتها بنسبة ١٥% برضو بسبب نقص التمويل. الأوضاع الغير إنسانية البيعيشوها لاجئين غرب دارفور محتاج مناصرة وضغط من كل الجهات والأجسام الفاعلة عشان يتم تحسين أوضاعهم، وبرضو عشان يلقوا الأمان الكانوا بيفتشوا عليهو لمن فروا من جحيم الحرب في السودان.

Leave a Comment

Your email address will not be published. Required fields are marked *

Scroll to Top