شاب بأطراف مبتورة

للناس الكانت ساكنة في حي (المدارس)، التوتّر الشديد كان هو سِمة الأيّام ما قبل هجوم 24 أبريل. مع ذلك، أغلب الناس كانت بتتجهّز لإنّها تواصل شغلها عادي بالصباح. لكن في اليوم دا ما صحوا بالأصوات المألوفة ليهم.

«الناس اتفاجأت بأصوات أسلحة واشتباكات عنيفة»، بيبدا أحمد (22 سنة، من حي المدارس) قصّتو بعد هجوم يوم 24. لمدّة استمرت شهور متواصلة اتحولت فيها الجنينة «لي مقبرة جثث ومدينة أشباح. يوميًا بيكون في اشتباكات جديدة، وصوت رصاص عالي من اتجاهات مختلفة. يوم بنسمعو قريب، ويوم بنسمعو بعيد. ومع قطعة الشبكة، ما كنّا قادرين نعرف الحاصل شنو، وما بنقدر نطلع الا بلّيل، وحتى بلّيل ما آمن لأنّو في كمّية من القنّاصات المستعدّة إنّها تضرب أيّ زول في أيّ لحظة بدون تردّد.

«في واحد من الأيام دي، الصباح انا كنت ماشي من بيتنا لي بيت جيرانا. فجأة، الضرب دوّر من كلّ اتجاه ولقيت نفسي مضروب رصاصة في رجلي». بعد معافرة مع الألم والخوف، قدر أحمد يرجع البيت. لكن لمّا بقى محتاج يمشي المستشفى، لقى إنّو «مافي مستشفيات شغّالة إلا واحدة وما قدرتَ أصلها إلا بعد تسعة يوم من الإصابة. لمّا مشيت، الدكاترة قالوا لي رجلك عفّنتْ وماف حل غير إنّها تتقطع. وفعلًا دا الحصل». حسب كلامو، في أرقام مقدّرة من الدكاترة ماتوا في طريقهم للمستشفى في وقت الناس محتاجة فيهو للدكاترة شديد.  

في مدينة بقت مليانة جثث، «ما كان في طريقة إنو ندفن الناس البتموت ولا نسعف الناس الاتصابو». الطامّة الأكبر حصلتْ لمّا «قوة كبيرة من الدعم السريع والجنجويد حاوطتْ الحي وبقوا يفكّوا قنابل ودانات عشوائيًا بكثافة وفي اتجاهات مختلفة» ونتيجة لكده، «في أسر كاملة ماتت وما نجى منهم ولا زول».

في ظل أوضاع زي دي، أيّ زول حيبدا يفكّر في الهرب. وأحمد كان واحد من الناس ديل. «لو قعدنا معناها حنستنّى الموت يجينا في محلّنا على شكل طلقة طايشة أو دانة عشوائية، ولو طلعنا ما معروف نعيش ولا نموت. لكن لو طلعنا، على الأقل، في احتمال إنّو نصل مكان آمن».

بدت رحلة هرب أحمد «باللّيل بعد الساعة واحدة. مشينا في مجموعات في اتجاه (أردمتا)، نسوان ورجال وأطفال. مشينا مسافات طويلة، لغاية وصلنا جنب (وادي كاجا)، وكان ملان موية. فجأة، نزل علينا رصاص تقيل، في ناس دخلو الموية وغرقوا لأنهم ما بعرفوا يعوموا، وناس اتصابوا وهم جوّا الموية، والباقين رجعوا بسبب الرصاص. أنا مشيتْ حي (الجمارك). 

«الشوارع هناك كلّها كانت مردومة، تجي ماشي تلقى روحك عفصتَ جثة زول ميت». بحسب كلام أحمد، كلّ الرجال كانوا مستهدفين، ومفروض يجاوبوا على سؤال رئيسي: «إنتو مساليت؟» ولو ردّيت بنعم، «ممكن يضبحوك عادي». في جزو من الناس البيتقبضوا ديل «بيرقدّوهم في الواطة ويفتحوا فيهم الرصاص».

«أنا نجيت من حي (الجمارك) ومن الموت مرّات كتيرة، لغاية ما وصلت تشاد». في مستشفى (أدري)، لقى دكاترة يسعفوهو، لكن في نفس الوقت، «ماف زول سألني الضربك شنو أو الحصل ليكم شنو».

احتمال الناس هناك، دكاترة أو غيرهم، سمعوا قصص زي بتاعة أحمد مرّات كتيرة، وأيّ زول عارف منو الجاني على الآلاف الجو الحدود التشاديّة. «هنا الوضع آمن وأحسن من الجنينة، لكن ماف أدوية، ولا أكل كافي، وفي أطفال بيموتوا بالملاريا وسوء التغذية». 

بالنسبة لأحمد لمّا يقعد ويفكّر في الحصل ليهم في الجنينة، ما بيقدر بيشوفو غير إنّو «تطهير عرقي موجّه، ومستهدفين بيهو قبيلة المساليت تحديدًا. الدعم السريع، الجنجويد، مليشيات العرب، والجيش والشرطة كلّهم مشاركين في الجريمة دي، والجيش دا هو البدا المشكلة ومشى خلّانا وما دافع عن المواطنين». والحل؟ 

«لازم كلّهم يتحاسبوا على جرايمهم وعلى تواطئهم مع المجرمين».

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Scroll to Top