سنار العزيزة

هذه الحكاية مبنية على أحداث حقيقية عاشتها سنّار وأهلها خلال  الحرب الأخيرة. الراوي الذي نسمّيه هنا طارق – وهو اسم مستعار – يروي تجربته الشخصية بكل تفاصيلها، من لحظات الحصار وحتى العودة، شاهداً على تحولات مدينة أحبّها وما زال يرى فيها بيته ووجدانها.


سنّار كما ترويها كلمات طارق : ولاية تميّزها تركيبة سكانية متنوعة، لم ترتبط فى البدء بقبائل محددة. لكن ما جمع الناس حول سنار هو حقيقة أنها مركز حضاري وتجاري وزراعي، الحاجة الخلت الناس رغم اختلافهم وتنوعهم يجتمعوا حول وجدان مشترك غير مرتبط بالضرورة بعلاقات الدم. ومن تجربة شخص انتقل من الخرطوم إلى سنار في سنين الصبا، بشوف طارق أن سنار بتذوب في الشخص وملامحه، فبيقدر بطريقة عفوية يتعرف على الناس من سنار في وسط الحشود، رغم عدم وجود سحنة أو صفات متجانسة معروفة ومنسوبة لأهل سنار.

“سنارة بالنسبة لي عزيزة جداً، بحبها، بحس إنو المكان دا بيشبهني، أنا ما غريب في أي حتة في سنار. المدينة ربّتنا وفي فترة الحرب حبي ليها زاد.”

في قلب السافانا جنوب شرق السودان، تجاور سنار النيل الأبيض غرباً، وتستقبل من إثيوبيا موسمياً نهر الدندر شرقاً. بينما تحتضن النيل الأزرق منحدراً من الدمازين، تملأ منه خزّان سنّار ترعتيّ الجزيرة والمناقل، وتروى معه وجدان الناس ثم ترسله نحو الشمال. الوفرة المائية دي خلقت عند الناس شعور عام بالتقدير للموية، ونمط حركة بين أجزاء سنار مرتبط بالكباري. في قصة طارق، حنسمع أسماء كباري وشوارع مهم معرفتها في القصة، هي: شارع الخزان، كبري دوبا، وكبري الدندر.

شارع الخزان: شارع يمر بخزان سنار وقيادة الجيش، ويربط بين شرق وغرب سنار.

كبري العرب: كبري صغير غرب سنار يربط المدينة مع جبل موية ويفتح على طريق سنار – النيل الأبيض.

كبري دوبا: مقام على نهر الدندر شمال سنار، يربط بين سنار والقضارف عبر محلية الفاو.

كبري الدندر: مقام على نهر الدندر يربط بين شرق سنار وغرب القضارف.

عندما بدأ الحصار

أول ما الدعم السريع دخل الجزيرة في ديسمبر 2023 وبدأ يتحرك ناحية سنار، بدأ توافد تاني للنازحين للولاية، واتقفل شارع مدني – سنار أمام حركة الشاحنات التجارية. فبقت احتياجات الولاية من البضائع والسلع بتجي من ولاية القضارف عن طريق واحد هو طريق الدندر الشرقي. اتقفل برضو شارع الخزان البيربط بين شرق وغرب سنار بالحاويات من قبل الجيش، فبقت الحركة من وإلى مدينة سنار عن طريق الشارع القديم، شارع وعر فيهو خيران كتيرة بحسب وصف طارق، والرحلة بقت أصعب. دي كانت بداية اختناق اقتصادي ما أثر على سنار براها، لكن برضو على ولايتي النيل الأبيض والأزرق المرتبطين بطرق التجارة عبر سنار.

بجانب حركة التجارة، اتعثرت حركة المواطنين، واتفرض حظر التجوال من الساعة 8م، مع حملة اعتقالات خلت أي زول يحسب حركته بحذر ويشيل معاهو إثبات الهوية في أي مشوار.

اختنقت سنّار بنقص السلع والبضائع، واختنق الناس وجدانياً بالترقب والهلع. لغاية ما انقطعت شبكات الاتصال عن سنار وولايتي النيل الأبيض والأزرق، فبقى كمان في ندرة في الكاش مع توقف تطبيق بنكك، والناس بقت تمشي القضارف تجيب كاش، مرتين في اليوم أحياناً! وظهرت مهنة جديدة: “تجار الكاش” – يجيبوا قروش من القضارف وياخدوا نسبة، لأنو ببساطة القروش في التلفونات والشبكة مقطوعة. 

“كانت فترة اللا ابتسامة، الدعم السريع كان قريب لكن كان ما بيهاجم، والجيش قاعد، فكان في تساؤلات: نمشي؟ نقعد؟ هل حنقدر نوفق أوضاعنا؟”

عندما بكت عيون سنّار

مع قلق الترقب، نشطت مخيلة الناس في تصور الإحتمالات الممكنة، و استعادوا سيرة أحد حكماء سلطنة الفونج، الشيخ فرح ود تكتوك -البيعرف أحياناً بحكيم السودان – و تداولوا مقولة مشهورة ليهو عن مصير سنار قال فيها: “سنار يا حرقة يا غرقة”. هكذا، استقبلوا خبر سقوط جبل موية في يونيو 2024 على أنه الإنهيار العظيم.

بعدها طوالي، هاجم الدعم السريع كبري العرب البيعتبر مدخل لمدينة سنار من اتجاه الغرب وبيفتح على الطريق القومي نحو ولاية النيل الأبيض، وطلعت أخبار بإنو المدينة سقطت، ورجعت الحرب تأخد بعدها النفسي تاني. أول ما اتسمع صوت الضرب باتجاه كبري العرب، وبحكم انو الناس شافوا وعايشوا تجارب النازحين من الخرطوم والجزيرة، وبفعل الهلع، نزحت أعداد كبيرة من الناس لي سنجة، جنوب الولاية، باعتبارها الملاذ الأخير.

بعدها بتلاتة أيام، هاجم الدعم السريع سنجة بالقصف المدفعي العنيف. وصف طارق، أن سقوط سنجة لم يكن ذو وقع عسكري فقط، لكن زادت الصدمة والشعور بانعدام الخيارات، وتحطمت الآمال بعد إنسحاب الجيش من سنجة، وتوسع الهجوم بعدها بوقت لمحلية السوكي.

“السؤال بقى نمشي وين؟”

في الإجابة على السؤال دا جزء مقدر من سكان سنار، والنازحين فيها ما طلعوا من بيوتهم باعتبار إنو ماف مهرب أو ماف خيارات..

داخل المدينة، الحرب، وخارجها

كل الآمال داخل مدينة سنّار – مع تصاعد الأخبار – كانت معقودة على عدم انسحاب الجيش من رئاسة اللواء 265 الموجودة داخل خزان سنار، لكن الجيش انسحب من سنجة، وبعد الإنسحاب، الدعم السريع ضرب محولات الكهرباء فانقطع التيار الكهربى عن كامل المدينة.

يعني شنو تنقطع الكهرباء؟ يعني الموية حتنقطع عن كل الناس الما نزحوا، لأنه إمداد المياه معتمد على سحبها  بالموتورات من الخزان. انقطاع الكهرباء برضو بيعني توقفها من الطواحين. في وقت أساسا فيه ندرة في السلع، دي عقبة كبيرة قدام الناس الإعتمدوا على تدقيق العيش “دق العيش” وعلى الكسرة والعصيدة كغذاء أساسي. وصف طارق مشهد صفوف الطواحين  بأنها كانت “حياة أو موت” وحكى عن مشاكل قد تكون أودت بحياة ناس.

وقتها قرر طارق وأسرته وعدد كبير جداًَ من الناس -يقدر بأكتر من 50 ألف شخص- التحرك نحو الدندر قاصدين النزوح إلى القضارف. أسعار المواصلات من الدندر للقضارف اتضاعفت 6 مرّات، من 20 ألف في الوضع المستقر لي 120 – 150 ألف جنيه، في وقت أتكدست فيه الكباري والشوارع بالعربات والحركة بقت بطيئة جداً، الحاجة الخلت جزء من الناس ناموا في الشارع في انتظار العبور، وآخرين مشوا كداري عبر الخيران والأودية لغاية القضارف. 

خص طارق تجربة عبور كبري الدندر بالذكر، حيث كان هو وأسرته وعشر أسر أخرى على متن “دفار” فأثناء عبورهم مع اكتظاظ الشارع ، هاجم الدعم السريع الدندر. فزع الناس و ترجلوا عن المركبات والعربات، وبدأوا الجري والهرولة. قال بأنه وكل أفراد أسرته كانوا ماسكين ببعضهم، لأنو مع إنقطاع الشبكات مفارقة المجموعة تعني الضياع. 

بعدها بوقت قصير استعاد الجيش كبري دوبا، وبقى يطلع الناس من المدينة بالطريق الشمالي الشرق بى طوف لمحلية الفاو في القضارف ، وفي حكاوي عن إنو أحياناً عناصر الجيش بيشيلوا قروش مقابل يحموا عربات المسافرين لحدى الوصول.

محطة القضارف: معاناة ومنفذ 

وصل طارق وأسرته للقضارف في يوليو ونزلوا في قرية جنوب القضارف مع معارف، وصف التجربة دي بأنهم كانوا مرفهين لأنو ما عاشوا تجربة مراكز الإيواء لكنه شاف معاناة الناس واتفاعل معاها. اتملت القضارف بالنازحين بما يشبه “يوم الوقفة”، وارتفعت الإيجارات بشكل غير معقول، تلقى طارق عرضاً لإيجار قطية وحمام وسور بسعر 500 ألف جنيه. المعروف عن ولاية القضارف حتى قبل الحرب، هو العطش وندرة المياه، فواجه النازحين واقع مختلف تماما عن واقعهم في سنار، وأعباء جديدة زي الإيجار للناس المستطيعين، وشراء الموية وأوضاع إنسانية سيئة جداً في دور الإيواء. حسب وصفه، النازحين بإختلاف مواقعهم ما قدروا يتأقلموا أو يشعروا بالاستقرار تماماً وحتى التجار ما فتحوا محلات جديدة في إنتظار إجابة لسؤال حيحصل شنو؟ وحنرجع ولا حنقعد؟ 

آخرين، زي طارق، القضارف كانت محطة بالنسبة ليهم نحو بورتسودان أو نحو الخارج. رحلة طارق وأسرته كانت إلى خارج السودان، ولكن مع التضيقات البيواجهها السودانيين في الحصول على التأشيرات والسفر اتغيرت الوجهة إلى أوغندا في شرق أفريقيا. 

“كنا محظوظين بإنو كنا بنقدر نطلع ونسافر، في ناس ما كان عندهم الخيارات دي”

“أهلا بالرجوع إلى الربوع”

مع واقع النزوح الصعب وتفشي الأمراض زي حمى الضنك في كسلا والقضارف، قرر كتير من الناس العودة إلى مصير مجهول في سنار حتى قبل إستعادة الجيش ليها وقالوا “أحسن نموت في بيوتنا”. وحتى بعد استعادة الجيش للولاية في مارس 2025 ورجوع آلاف من الناس لي بيوتهم ما زال الوضع الأمني فيها مضطرب وفي ناس كتيرة قررت انها ما حترجع. أما طارق، فرجع لي سنار بتاريخ مايو 2025 بعد 9 شهور من التغرب في كمبالا ومتابعة أخبار سنار من على البعد بقلق موحش على الأهل والأصحاب الما طلعوا منها، وحكى إنو لحظة العودة كانت أجمل إحساس في حياته لأنو العودة ما بس وصف حركي، لكن العودة للبيت بتعني سقوط هم الإيجار وأعباء اقتصادية أخرى أثقلت كاهل كل النازحين واللاجئين.

ولكن الحرب المستمرة في السودان، غيرت ملامح سنّار وخلتها شاحبة، وبينما الحياة بترجع ليها شوية شوية، بيزيد فيها الوجود العسكري مذكرّا بما حدث وبما يمكن أن يحدث. 

“انا راجع اقعد في بيتنا، ماف زول حيدق لي الباب للايجار، راجع مكاني العرفتو وبيعرفني، كبرت فيه وكبرني”.

Leave a Comment

Your email address will not be published. Required fields are marked *

Scroll to Top