استخدام القناصة كان واحد من العناصر المؤثرة شديد في تضييق الحصار على الناس في الجنينة وفي غرب دارفور كلها، وبالرغم من كدا ما لقى اي تغطية إعلامية ولو حصل واتكلمت القنوات الإخبارية عن البيحصل في غرب دارفور بيتم الكلام عن الضحايا والقتلى كأرقام تقديرية بدون ذكر اسمائهم ولا ماتوا كيف.
القناصة ما كانوا بيستهدفوا مقاتلين زيهم أو قوات مسلحة، لكن كانوا بيستهدفوا المواطنين العزل بما فيهم الأطفال والنساء الكانوا بيجيبوا الموية بليل من الأبيار والتونكي والوادي.
وحسب الحكايات السمعناها كانوا بيتمركزوا في حتات عالية زي الشجر، وسطوح البنايات والبيوت في شوارع محددة. ناس كتار إتكلموا عن الصعوبات النفسية والمادية الواجهوها، وكيف البيوت اتحولت لمستوصفات مؤقتة للجرحى ومكان لاستقبال الجنازات، إنقطع الأكل والموية والتفتيش عنهم قد يعني الموت بي قناصة.


