حريق مستري

مستري واحدة من الوحدات الإدارية التابعة لمحلية بيضة جنوب الجنينة وبيبلغ عدد سكانها ٤٥ ألف تقريبا. بعد ١٤ يوم بالضبط من سقوط الجنينة في يد المليشيات – يوم ٢٨ مايو-  بدأت مستري تتحرق بأيادي نفس المليشيات الحرقت مورني، وسربا وعدد كبير من المحليات والقرى بعدها.

إتحرقت البيوت كاملة بالأطفال والنساء وكبار السن الجواها، وحصلت فيها جرائم قتل عشوائي وجماعي كتيرة خلت الناس تعمل مقابر جماعية وحسب قصص الناجين والناجيات اللاقيناهم – شوارع مستري إتملت بالدم والجثث، حكوا عن المليشيات وقوات الدعم السريع وهي بتدخل بالآليات التقيلة والدوشكات وبتدمر أي حاجة في طريقها. الشهادات برضو أكدّت انو الحصل في مستري ما كان صدفة، و عنده علاقة بالاستيلاء على أراضي مستري و إبادة مواطنيها: “ما عندو حاجة اسمو استهداف فردي بقي استهداف جماعي لي ناس مستري كلو انت لو لقوك بس يقتلوك او ينهبوك و الدايرين يقتصبو بقتصبو يعني ما عندهم هدف معين اصلاً دايرين يمسكوك و يبيدوك من ارضك ويجو يدقو الناس العندها اراضي ودا مشروع تجمع العروبة شغالين من زمن بعيد والدولة عارفة و عندو ضلع في الموضوع دا و شعب مستري كلو عارف الموضوع دا شغالين لي شنو والمواطنين كلو عارفين  من مسئولين و ادارة اهلية الحاصل شنو و دي حاجة تم إبادة جماعية بالفم المليان كدا”.

وحكوا برضو عن دور الإدارات الأهلية التحريضي البيخدم تحقق مصالحها في مقابل حياة كتير من الناس الماتوا وإتنهبت وإتحرقت بيوتهم. دا كلو كان بيحصل في غياب كامل من الإعلام الرسمي وفي وقت كانت شبكة الإنترنت والإتصالات مقطوعة في غرب دارفور كلها وغير مستقرة في أجزاء كبيرة من السودان.  وعاودت نفس المليشيات يوم ١ يونيو إنها تحرق البيوت وكل الحياة الفضلت هناك.

بعد الأحداث دي إتهجر كل سكان مستري  في مجموعات وأفراد، وفي اتجاهات مختلفة منها معسكر قنقر في تشاد. الشارع من مستري لي تشاد كان رحلة في مواجهة الموت برضو، ناس كتيرين كانوا مصابين وماتوا في محاولات الوصول، وناس تانين راحوا في الخلا وما إتلقى عنهم خبر بعدها.

Leave a Comment

Your email address will not be published. Required fields are marked *

Scroll to Top