الوضع الإنساني في غرب دارفور بعد ٢٤ أبريل

الانتهاكات الجسيمة الاتعرضو ليها سكان غرب دارفور سواء كان القتل او الاصابة او الاعتداء الجنسي ما كانت هي السبب الوحيد في أنهم يفرو لمعسكرات اللجوء في تشاد. سوء الأوضاع الإنسانية برضو كان عامل مهم جدا خصوصا مع الحصار الاتعرضت ليهو الولاية لما يقارب العام من قبل قوات الدعم السريع والمليشيات المتحالفة معاها؛ واللي كان حصار صارم جدا من بداية الأحداث في الولاية في ٢٤ أبريل ٢٠٢٣. 

واحدة من الناجيات القابلناها في معسكر في تشاد قالت: “كنا بنطلع بالليل نجيب الموية عشان القناصين ما يشوفونا”. المليشيات وقوات الدعم السريع كانوا محاصرين الناس في البيوت وقافلين الشوارع وموزعين قناصين فوق سقوف البيوت داخل الجنينة، وكانوا بيمنعوا اي زول انو يطلع من بيتو يفتش موية او اكل خصوصا الرجال كان بيتم اطلاق الرصاص عليهم أو الاعتداء عليهم جسديا بالتحديد لو كانوا بينتموا للمساليت، الشي الكان بخلي النساء هن اليمشن يجيبن الموية وبتعرضن للاعتداء اللفظي أو الجسدي. وحسب إفادات الشهود القابلناهم القوات دي سرقت بوابير الموية ومولدات الطاقة البتوصل الموية للأحياء، وبرضو تم قطع شبكات الاتصال والإنترنت في الولاية لما يقارب العام وما رجعت الا في وقت قريب ورجعت جزئياً بس. مافي واحد من أطراف الحرب اعترف بانو هو الكان مسؤول عن قطع الشبكات وعزل غرب دارفور عن العالم. قطع شبكات الاتصال والانترنت غير انو منع المواطنين من انهم يتواصلوا مع اهلهم والعالم الخارجي، بس برضو قطع أكل عيش ناس كتار معتمدين على تحويل الرصيد او على التحاويل المالية. بعض الشهود قالوا انهم في الشهور الاولى وقبل يلقوا طريقه يهربوا بيها من الجنينة الى تشاد، كانوا معتمدين في اكلهم على المتبقي من مؤونة رمضان ٢٠٢٣، والما كان عندو مخزون كافي كان بضطر يمشي لسوق العرديبة الببعُد حوالي ٣ كيلومتر من الجنينة، الصعوبة ما كانت بس في الطريق الطويل المليان بالقناصة، حتى بعد وصولهم للسوق كانوا بتعرضوا لإعتداءات اذا اتعرف انهم من سكان الأحياء الجنوبية و الاعتداءات دي ممكن تصل للقتل. دا الخلى العيش في المكان ده شبه مستحيل مع الحصار المفروض عليهم وغياب منظمات العون الإنساني الغادرت الولاية مع بداية الأحداث واتنهبت مقراتها من قبل المليشيات وقوات الدعم السريع. 

في شهادتها لينا، حكت واحدة من الناجيات من مورني: “ما كان طواحين ، يعني دي حاجة مؤسفة ممكن يكون نحن رجعنا للعصور الاولى ، وصلنا لي درجة انو العيش بنبلو بعداك بندقو بال الفندق ، بعداك يتحول اتساط بيهو العصيدة .. يعني عندنا كم يوم ما كان في طواحين ، مافي دكان في الفترة الاولى لانو حتن الدكاكين كان بيخافو ممكن تفتح دكانك يجي ينهبوه ، فدي كانت اسوء حاجة بس يا اما تعمل عصيدة بي ملاح كول يا عدس ، يعني بس شغالين  الاتنين ديل تاني مافي حاجة ، يعني نحن الشاي م شربناه الا بعد اسبوع ولا 10 يوم  ، ف دي كانت اكتر حته مأساوية و دا ممكن يكون سبب لي سوء تغذية للأطفال و العجزة ، يعني احنا عندنا  اطفال ما قادرين الصباح عشان نعمل ليهم نشا ولا نجيب ليهم لبن ولا كدا لأنو كن مافي حاجة ، لافي قروش في اليد ولا في دكان فاتح” 

الوضع الصحي كان سيئ جدا لانو اغلب المستشفيات والمرافق الصحية العامة تم استهدافها ومهاجمتها بشكل متعمد، وتمت مهاجمة المدارس والمرافق الحكومية اللي كانت مراكز لإيواء المواطنين المتضررين من الأحداث الحصلت في الجنينة على مر السنين الفاتت. مع نقص الرعاية الصحية وانعدام المأوى واستحالة الوصول للخدمات الاساسية بسبب تدمير المرافق العامة ونهب الأسواق وحرق المحلات التجارية؛ ما يقارب ٣٠٠ ألف شخص من سكان غرب دارفور فروا الى تشاد و ٩٥ % من العدد ده هم فارين من مدينة الجنينة لانو تشاد تعتبر أقرب دولة للمدينة وبتقع على بعد ٢٧ كيلو متر فقط. وبنلقى اللاجئين السودانيين في تشاد منتشرين في عدد يتجاوز ال ١٠ معسكرات منها: معسكر ادري، معسكر ارونق، معسكر مجي، معسكر ابتنقي. 

Leave a Comment

Your email address will not be published. Required fields are marked *

Scroll to Top