في الوقت الكانت فيهو اخبار الحرب في الخرطوم بتتعرض في محطات التلفزة العالمية ومواقع التواصل الاجتماعي، غرب دارفور كانت بتشهد موجة عنيفة من الانتهاكات الممنهجة وبتتعرض لي فظائع ممكن ترقى لانها تكون جرائم إبادة جماعية على حسب وصف المدعي العام للمحكمة الجنائية الدولية في يوليو ٢٠٢٣. البيحصل في غرب دارفور كان في الظلام لانو في حصار كان مضروب حول الولاية من قبل قوات الدعم السريع والمليشيات المواليه ليها، ده طبعا بالاضافة للانقطاع الكامل لشبكات الاتصال والانترنت من يوم ١٩ مايو ٢٠٢٣. حسب افادات بعض الناجين\ات وهم\ن في طريق الفرار من الجنينة أو غيرها من المناطق الشهدت الانتهاكات دي، كان بيتم تفتيشهم من قبل المليشيات دي وبيتم نهب تلفوناتهم وده خلا معظم الأحداث اللي تم توثيقها سواء كان بالصور او الفيديو او حتى بالصوت ما تطلع للإعلام. كان واضح جدا انو مقصود فصل غرب دارفور بشكل كامل عن العالم وده بيفسر الشهادات المروّعة الحكوها لينا الناجيين والناجيات من الأحداث في غرب دارفور. في افادة لواحدة من الناجيات من الأحداث دي قالت: ” لمن حصلت الاحداث في الجنينة افتكرنا انو الشعب السوداني ح يحس بينا معانا لكن للاسف ماف زول وقف معانا من الشعب السوداني ولا من المسؤولين ولا من حاكم اقليم دارفور ولا من الشرطة ولا من الجيش ولا من الاعلام السوداني للاسف كلهم مشغولين بالمشاكل الحصلت في الخرطوم بين قوات الدعم السريع و الجيش في حربهم القايمة في الخرطوم انحنا ما لقينا اي انصاف و ما لقينا اي تعاطف من اي زول موجود في خارج اطار الولاية ما لقينا تعاطف بتاع اقليم ولا بتاع دولة وكنا غايبين تماماً عن الاعلام كأنها حاجة مقصودة او مخططة ما لقينا اي هناي مناصرة للحصل في الجنينة”


