معجزات وقوّة إرادة

عدد كبير من المصابين الكانوا بيحاولوا يصلوا تشاد ماتوا في الشارع نتيجة لمضاعفات الإصابة، محمد أستاذ (33 سنة)، كان من القلّة المحظوظين القدروا يلقوا مساعدة في إنّهم يصلوا وتمّ إسعافو في مستشفى (أدري) وهسه قاعد في المخيم. المساعدة اللقاها كانت مكان يبيت فيهو، بطانية، وكتف اتّكل عليه لغاية وصل لي معسكر (أبو طيرة) ومن هناك نقلوهو مع المصابين التانيين بعربات لمستشفى (أدري). ناس عاديين، هم المدّوا يدّينهم — ما كان بيعرفهم ولا بتربطو معاهم صلة،  وبالرغم من إنّها بتتشاف بسيطة، إلا إنّها أنقذت حياتو.

«االقصّة بدتْ يوم 24 أبريل لمّا كنتَ قاعد في البيت مع زوجتي وطفلي في (حي 13) جنب (الغابات) جنوب الجنينة. من الصباح كنّا بنسمع أصوات الذخيرة والرصاص وعرفنا إنّو في اشتباك بين الجيش والدعم السريع قريب لقاعدة القوات المشتركة».

وبعد انسحاب الجيش، الأحياء الجنوبية بِقَتْ مفتوحة للمليشيات، دخلوها وبدوا ينشروا الرعب، وبقوا بيعملوا هجمات متتالية كل يوم، ماتوا فيها عدد كبير من المواطنين العُزّل الكانوا بيدافعوا عن بيوتهم أو الكانوا بيحاولوا يطلعوا منها.

«عرفتَ طوّالي إنّو لازم نطلع من البيت ونمشي حتّة آمنة. هنا حياتنا مُعرّضة للخطر لأننا مساليت ولأنّو ماف جيش ولا شرطة حتجي تدافع عننا..»

وحصل ما لا يحمد عقباه، اضطر إنّو ينفصل عن أسرتو. «زوجتي وطفلي مشوا في إتجاه (أردمتا) عشان يحتموا هناك بالجيش، وما قدرتَ أمشي معاهم لسببين: أولًا لأنّو المليشيات كانت بتخلّي النساء والأطفال بس يمرّوا من الإرتكازات الكتيرة بتاعتهم، وبيقتلوا الرجال بعد يسألوهم من قبيلتهم».

والسبب التاني كان لأنّو أستاذ معروف في الجنينة وكان بيتم بشكل خاص استهداف الدكاترة والأساتذة والمحامين. افترق من أسرتو وهو ما عارف حيلاقيهم تاني ولا لا. وبعد معاناة مع القناصات والرصاص العشوائي وصل حي (المدارس). 

«قعدتَ هناك لمدّة شهرين، كانت بتجينا أخبار عن الجرائم ضد الإنسانية البترتكبها المليشيات». وما بتجيهم أخبار بس، هم شافوا بعيونهم وعاشوا في ظل تهديدات مستمرّة. شهرين من الحصار ما كان بينوم كويّس ولا بياكل كويّس، وشعورو بالأمان منعدم تمامًا.

«طوال الفترة دي، كنتَ مستني بترقُّب إنّو الحكومة تتدخّل بطريقةٍ ما وتدافع عن المواطنين وتوقّف المجزرة الحاصلة. لكن بمقتل الوالي يوم 14 يونيو، قِنِعتَ من إنّو الجنينة ترجع لي حالتها الزمان».

حالة فقدان الأمل دي ما عاشها براهو، لأنّو بعد الحادثة دي معظم أهالي حيّ (المدارس) طلعوا من بيوتهم وانقسموا لي إتنين، ناس كانوا عايزين يمشو (أردمتا) عشان فيها الجيش، وناس تانيين كانوا عايزين يمشوا تشاد لأنو ما فيها جنجويد ودعم سريع.

محمد اختار يمشي مع الناس الماشين (أردمتا) عشان يلاقي أسرتو الانقطعتْ اخبارهم مع انقطاع الانترنت والمكالمات، لكن ما كان في طريقة إلا يستنّوا الساعة 12 أو 1 بالليل؛ بالنهار المسلحين منتشرين في كلّ مكان.

عدد كبير من الناس، وهو في نُصّهم، كانوا ماشّين الليل كلّو لغاية ما الصباح جاء. ودا ما مجاز عن انتهاء الظلام والقتل، لأنّو طلوع الشمس بيعني طلوع المليشيات لحصاد المزيد من الأرواح، ودا الحصل. 

«فجأة، اتحاصرنا بالرصاص العشوائي من كل الجهات، أنا والناس الما ماتوا جرينا راجعين في اتجاه حي (المدارس). هناك اتفاجئنا بإنّو الدعم السريع منتشر في الحِلّة و بيحرق في البيوت. هنا أيّ زول فينا جرا في اتجاه مختلف. جريتْ في الاتجاه الجنوبي لغاية ما وصلتَ حي (الجمارك) وقعدتَ مع عمي في بيتو هناك.

«اليوم البعدو، الساعة 8 صباحًا، هجموا علينا تاني في (الجمارك). المرّة دي كان في شباب مسلّحين بيدافعوا عن بيوتهم جنبنا، ذخيرتهم انتهتْ سريع وقاموا جاريين».

مع هرب الشباب المسلحين، جوا عساكر من الدعم السريع بيفتّشوا عليهم، لكن لقوا محمد وعمو. «وأوّل حاجة قالوا لينا إنتو مساليت؟ وأسلحتكم وين؟ قلتَ ليهم ما عندنا أسلحة وإنّو الشباب المسلحين ديل جرو. بعد اجابتي، جزو منّهم طلع برّا يشوف الشباب ديل جرو في ياتو اتجاه، والباقين كانوا منتظرينهم جنب باب الشارع. في اللحظة ديك جرينا أنا وعمي وتلّبنا بالحيطة. لحقنا واحد منهم وضرب عمي في راسو بالدبشك. عمّي قدر يتلّب لكن وقع. واثناء ما بيحاول يقوم، فتحوا فينا قريب 11 طلقة عشوائية، ما صابتنا ولا واحدة فيهم، ودي كانت معجزة لكن ما الأولى ولا الأخيرة.

«افترقنا بعدها انا وعمي واي زول فينا جرا على اتجاه. أنا ما كنت عارف امشي وين، الجماعة ديل في كل مكان. الحاجة الوحيدة الفكّرتَ فيها انّو ارجع البيت في (حي 13). جريت على الاتجاه الشمالي وما كنتَ عارف انو الاتجاه دا فيهو كمين».

الكمين هو ارتكاز بيعملوهو الدعم السريع والمليشيات، وعادةً دي حتات بتحصل فيها مجازر: بيقعّدوا الناس في الأرض وبيفتحوا فيهم الرصاص.

«كان في كبري جنبي، وأوّل ما شفتهم من بعيد، تلّبت من الكبري ووقعتَ في الخور. هم شافوني واستغربت انّهم ما سألوني. قريب من الخور، شفتَ شجرة نيمة وقعدت تحتها لأنّي كنتَ تعبان ومرهق. بعد مسافة، جاني واحد منّهم وقال لي انت بتسوي شنو هنا؟ قلت ليهو أنا جاي من (19) وماشي بيتي في (13). قال لي انت كَمْرَد مسلاتي؟ قلت ليهو انا ما كَمْرَد ولا عندي سلاح ولا عندي علاقة بالمسلّحين، لكن ما اقتنع وبقى يغالطني».

أثناء ما هم بيتكلّموا، ظهر شاب كان ماشي في الشارع، لمّا شافهم قام جاري. بسرعة، جرو وراهو وقتلوهو فوريًا وجوا راجعين لي محمد. كانوا زي 12 نفر، إلتفوا حولو وبقوا يقولوا ليهو يا «أمباي إنتَ بتسوّي شنو هنا؟» 

«وهم بيستجوبوا فيني، إتنين منّهم اتعرّفوا علي وحصل بيناتنا حوار:

– انت يا استاذ محمد ساكن في حي (المدارس) الجابك هنا شنو؟ انت كَمْرَد مسلاتي؟

– ياخي أنا بيتنا الكبير في (المدارس) لكن بيتي هنا في (13) وانا ما كَمْرَد وما مسلّح.

– لو معاك بندقية جيبها، ولو بتعرف زول بيدافع بي بندقية، ورّينا ليهو ونحن بنوصّلك محل ما انت ماشي.

– ياخي أنا ما عندي بندقية ولا بعرف المسلّحين.

«فجأة، جوا إتنين منهم، واحد كان شايل ساطور كبير وأوّل ما شافني واقف قال: الزول دا نضبحوا؟ كلّهم قالوا أضبحوا. قال لي أرقد وارفع الشهادة!

قلت ليهو لو أجلي تمّ حتضبحني ولو أجلي ما تمّ ما حتضبحني. قام ردّ لي:

– أجلك لو تمّ ولو ما تمّ حنضبحك!»

هنا، واحد من المسلّحين ضرب محمد بالدبشك في كتفو. «أنا غضبت شديد، وأدّيت الزول الشايل الساطور بُنية لغاية وقع في الأرض. لمّا وقع، في جزو منّهم قاموا جاريين وجزو بقوا ينزّلوا تأمينات أسلحتهم في استعداد لإنّهم يضربوني بالرصاص. بديتْ أجري في الاتجاه الجنوبي، لكن ما لحقت أهرب وفتحوا فيني الرصاص: رصاصة جات في رقبتي وطلعتْ بالكتف (لكن الحمد لله، ما صابت أيّ شريان)، ورصاصة تانية صابتني في فخدي.»

بالرغم من إنّو اتضرب وبقى ينزف، لكنّو ما استسلم وواصل يجري وهم لاحقنّو، لغاية لقى بيت تلّب فيهو ولسوء الحظ لقى تلاتة من الجنجويد قاعدين ينهبوا في البيت. لمّا شافوه، بدوا يسألوهو: «أمباي انت مجروح جيت من وين؟»

«قمت طوالي جريت وتلّبت تاني بالحيطة، قطعت الشارع ولقيت بيت تاني تلبت فيهو، لكن المرّة دي لقيتو بيت فاضي مافي اي حاجة غير السور. مرقتَ منّو وتلّبت في بيت تاني للمرّة التالتة، البيت دا لقيتو هيكل بس وباب الشارع حقّو فاتح. ظاهر كان في ناس قاعدين فيهو وطلعوا لأنّو في بطّانية كبيرة مفروشة»

رقد في البطانية ومسح وشّو وهدومو بالدم الكان بينزفو ومَثَّل إنّو ميت عشان يحمي نفسو لو زول شافو، وما مرّ وقت طويل قبل يجي تلاتة من المسلحين الكانو لاحقنو داخلين، «ولمّا شافوني واحد جا رفع يدي وفكّاها بيحاول يتأكّد أنا ميت ولا حي.

– دا الأمباي الضربناهو هسا؟

– اي ياهو زاتو.

–  أرح نضربوا تاني في راسو.

– هو مضروب في رقبتو وكتفو ورجلو خلو يتعذب»

وخلّوهو هناك ومشوا لكن بعدها بشوية جو تاني داخلين زي 10 جنجويدي كانوا عايزين ينهبوا البيت، ولمّا لقوهو هيكل ساي وما فيهو غرف طلعوا ومشوا البيت البعدو.

«بعد شافوني راقد زي الميّت والضبان الأخضر لامي فيني، بقوا يسألوا في بعض هل أنا ميّت من الصباح ولا أمس، لكن في اتنين منهم قعدو:

– شوف البطانية دي سمحة ارح نشيلها.

 الإتنين جرّوا البطّانية وقلبوني في الأرض ولقو فيها دم. 

– البطّانية دي وسخانة فيها دم الأمباي ده.

– شيلها غسّلها.

– لالا خلا خلا! دم الأمباي ما بتغسل!

جدعوها في رأسي ومشوا، بعد طلعوا بي 10 دقايق جو 5 غيرهم داخلين وبقوا يتكلّموا فوق راسي:

– في أمباي ميت هنا.

– البيت دا شكلو مأكول (قصدهم إنو منهوب).

– أي مأكول.

واحد منّهم مشى جهة ركن من أركان البيت لقى ليهو جداد وطوّالي قال للتانيين:

– أرح نشيل الجداد دا نتعشى بيهو.

– لالا خلو بنلقى لينا عتود.

طلعوا وقفلوا الباب وراهم. ومحمد قعد في البيت لغاية ما العشا أذّن، بعدها قرّر إنّو يطلع. بدّل فنيلتو الفيها دم بواحدة نضيفة كانت مرمية في الأرض مع هدوم ناس البيت المجدّعة. 

«لقيت كوم بتاع طوب ركبت فيو وتلّبتَ بالحيطة، كنتَ محظوظ لأنّي وقعتَ في رملة خلّتْ الوقعة ما حارة، لكن برضو ما قدرتَ أقوم وقعدتَ هناك مسافة طويلة لغاية قدرتَ أقوم واتحرك تاني».

مشى في اتجاه المستشفى (التخصصي الأكاديمي). وهو ماشي في الشارع، لاقى ولد عمرو بيكون 11 أو 12 سنة شايل ليهو زول مصاب في درداقة. «لما شافني، اتخلع وخاف وانا زاتي خفت. بعدّاك دار بيناتنا حوار كده:

– انت منو؟

– أنا محمد. 

– ماشي وين؟

– والله أنا عايز أمشي غرب اتجاه معسكر (أبو طيرة) أو اتجاه تشاد.

– مالك بتَحْبِي؟

– أنا انضربتَ رصاصتين وما بقدر أجري هسّة، إلا أحبي كدا.

– خلاص أنا ذاتي ماشي (أبو طيرة). نمشي سوا لكن بس عايز أوصّل أبوي دا المستشفى (التخصصي)، هو زاتو مضروب».

مشوا سوا في اتجاه المستشفى. الولد جارّي أبوهو في الدرداقة ومحمد بحبي وراهم. «كان بيقيف يستناني لغاية ألحقهم وتاني نمشي ونقيف. بالطريقة دي لغاية وصلنا». بعد العناء دا كلّو لقوا المستشفى قافلة فاتجهوا غرب طوالي قاصدين معسكر (أبو طيرة).

«مشينا ومشينا، الشارع كان طويل والواطة ضلمة شديد لغاية جينا جنب بيوت شكلها معظمها فاضية». في الوقت داك شافوهو تلاتة نسوان قاعدين قدّام واحد من البيوت دي. محمد كان ماشي الوقت دا كلو وهو مصاب وبينزف والجو باللّيل كان بارد. «كنتَ مرهق شديد من المشي. النسوان التلاتة عرضو علي إنّو أرتاح عندهم لغاية الساعة أربعة صباحًا، وبعدها، أواصل المشي للمعسكر».

وافق محمّد وقعد معاهن، أمّا الولد وأبوهو واصلوا رحلتهم لمعسكر (أبو طيرة)، شايلين معاهم آمال كبيرة. «كنتَ جيعان وعطشان وتعبان. اعتذرن لي إنّو ما عندهن أكل لكن أدوني موية ورقدوني في سرير. لكن بالرغم من كدا، حسّيت بالأمان، وهن طمئنوني..»

الطمأنينة بالنسبة ليهو كان تعريفها مختلف، لأنّو كان حاسي إنّو دي ممكن تكون نهاية حياتو. «طمّنوني لمّا سألوني من اسمي ومحل سكني وين، ومن اسم أسرتي ووعدوني إنو لو مُتّ، حيكلّموا أهلي، ولو ما مُتّ يصحّوني الساعة أربعة صباحًا أمشي مع الناس الماشين لي معسكر (أبو طيرة)». نام وهو بيفكّر في الحاجات الكتيرة الصعبة الحصلت ولمّا جات الساعة أربعة صباحًا، صحّوهو وأدّوهو بطّانية «أتغطّيت بيها وواصلتَ المشي.»

في الشارع، الناس كانت بتتحرّك في مجموعات متفرقة عشان يصلوا معسكر الاحتياطي المركزي (أبو طيرة). «لاقيت تلاتة شباب كانوا ماشين برضو. طلبتَ منّهم يساعدوني في المشي. إتنين منّهم رفضوا، والتالت، جزاه الله خير، تَكَلنِي على كتفو لغاية وصلنا. جمع كبير من الناس كانوا واقفين قدام بوّابات أبو طيرة، معظمهم جرحى ومصابين».

كان واضح بالنسبة لي محمد إنو ضباط ((أبو طيرة) زاتهم شركاء في الجريمة؛ لأنّهم ما كانوا بيسمحوا لأيّ زول ما مصاب يحتمي بيهم. «أنا وما يقارب التلتمية مصاب كلّنا ردمونا في عربية واحدة بتاعة (أبو طيرة)، وساقونا بحراسة من عربات الدعم السريع لغاية وصلونا مستشفى (أدري). وهناك تمّ اسعافنا وتقديم خدمات صحّية ولو إنّها بسيطة».

نجى من الموت مرة ومرتين وتلاتة – بإعجوبة، ومعجزة وحظ. الحصل دا ما بيتصدّق لو ما شفنا محمد وسمعنا صوتو وحكايتو. وهسّة رغم الصعوبة البتواجهو في الحصول على الغذاء وموية الشراب والسكن الجيد في مخيم أدري، إلا إنّو «مجرد النوم بدون أصوات ذخيرة وضرب هي واحدة من النعم البشكر عليها ربنا».

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Scroll to Top