في 24 أبريل 2023، السما كانت صافية تمامًا، كأنّها كانت بتقول إنّو ده حيكون يوم عادي من أيّام الصيف. على الرغم من الجوطة الكانت حاصلة في الخرطوم، ما كان في بال زول إنّو ده ممكن يكون أوّل أيّام الجحيم للناس الساكنين حيّ (التضامن) في الجنينة.
«أنا زينب وكنت ساكنة في حي التضامن قبل ما أكون لاجئة في مخيّم (أدري). عمري 26 سنة وكنت شغّالة في منظّمة وطنية اسمها (إعادة التأهيل للسلام والتنمية). كنت بحب شغلي شديد لكن هسي تمّيت 5 شهور واقفة».
لمّا الجيش انسحب من مناطق الاشتباك في الجنينة، أغلب الناس اتعاملت مع الهدوء اللاحق ده بحذر، وجزو منّهم فضلوا قاعدين في بيوتهم في محاولة لإنّو يفهموا الحاصل شنو، ويفكروا في المآلات المحتملة للدراما الحاصلة في البلد كلّها. وقبل ما ناس زينب يصلوا لأيّ خُلاصات أو قرارات، مليشيّات الدعم السريع قالت الكلمة الأولى.
«الضرب في اللحظة دي دوّر تاني وبصورة أعنف. والمرّة دي ما كان بين الجيش والدعم السريع، المرّة دي كان الدعم السريع ومليشياتو في مواجهة مواطنين عُزّل. وبما إنّو حي (التضامن) واقع جنوب الجنينة بعد رئاسة الشرطة طوّالي، وصلتنا نيران الجنجويد قبل الحتّات التانية، تحديدًا في الساعة إتنين ظهر».
كتير من سكّان الحي ماتوا من الضرب العشوائي للذخيرة، أيّ زول في الشارع، وحتّى في داخل بيتو، كان على بعد سوء حظ بس من الموت.
«أخوي الصغير جاتو طلقة نارية في يدّو وخالي اتصاب في رِجلو. بِكا ودموع وكواريك وصوت رصاص.. وبعدها الحياة ضلّمت في وشنا. المهم، بعد نقاشات كتيرة وصعبة، ولمّا لقينا إنّنا ما قادرين نعمل حاجة وما عندنا خيارات، حاولنا نطلع من حي (التضامن)، حاولنا نطلع في وضع الحركة فيهو كانت شبه مستحيلة».
زينب وناس بيتهم حدّدوا إنّو وجهتم حيّ (الثورة) – الحتّة الساكن فيها جدّهم. عشان ما كان عندهم فكرة عن الشارع، بدوا حركتهم بالنهار، في نص مصابين ومرضى (أمّها عندها سكّري). لكن اكتشفوا إنّو الحركة بالنهار هي زي قرار الإنتحار لأنّو مليشيّات الدعم السريع حاصرتهم في النص لحدّي ما لقوا ليهم بيت فاضي خشّوا فيهو.
«لقينا بيوت الحلة كلّها يا محروقة، يا قاعدة تتحرق، يا اتنهبت. عشنا في خوف ورعب لغاية الشمس غابت حتى قدرنا انا وامي واخواتي نواصل الشارع. حي (الثورة) في الأوضاع الطبيعية ما بعيد منّنا لكن الشارع كان مضلّم وماف كهربا وكلّ شويّة بكون في صوت رصاص».
كلّ القرائن كانت بتقول إنّو مليشيّات الدعم السريع جاية لناس معيّنين. «[أيوة] نحن المساليت المقصودين بي الهجمات دي»، قالت زينب لمّا سألناها. وبحسب كلامها، حتّى وصولهم لحي الثورة ما كان ضمان لسلامتهم من من المليشيّات دي.
«وفعلا دا الحصل! يوم الجمعة 12 مايو، هجموا على حي الثورة هجوم كان عنيف شديد، دخلوا البيوت بالأسلحة والدوشكات وضربوا الناس عشوائيا، لغاية ما جات دوشكا وقفت قدّام بيت جدي الكنّا قاعدين فيهو وضربوا كل الأبواب، ودخلوا علينا في البيت. ما حأنسى أبدا كيف [لمّا] دخلوا الحوش ولقوا خالي المصاب قاعد تحت مظلّة في كرسي وبدون اي مقدمات فتحوا عليهو النار.. قتلوهوا كدا بكل بساطة!»
بالنسبة لزينب، حياتهم كان ممكن تنتهي في أيّ لحظة. الرعب الخشّ فيهم والصدمة السيطرت عليهم من الأحداث دي كانت تجارب أشدّ وأكبر من أي شي اختبروهوا قبل كدا، وغالبًا حتكون حاجات صعب تنمحي من ذاكرتهم. لمّا الرصاص يدوّر، بيخشوا تحت السراير، وبالليل، عشان يقدر يشوفوا ليهم موية يشربوها (لأنّو ده الوقت الوحيد المناسب)، كانوا أهداف للقنّاصين المدّسين بين البيوت. «خيّرونا بين إنو نموت من العطش ولّا نطلع بالليل نجيب موية ونبقى أهداف متحرّكة للقنّاصين الفوق الجبل والبيوت…»
مرّت شهور وناس زينب في حصار وما قادرين يتحرّكوا من بيت جدّهم خطوة. ماف مستشفيات شغّالة عشان تتعامل مع الأعداد المتزايدة للمصابين (أغلبهم رجال وشفّع). الاستهداف الممنهج ليهم خلّاهم يدّسوا في البيوت وسط النسوان. البيوت دي بقت زي العيادات وبيت جد زينب بقى واحد منّهم «نسعفهم بالعندنا، وحتى الجثامين الكانت بتصلنا في البيت، بنحاول نكفنها وبندفنها بالليل. وضع كان كعب شديد بالذات للناس الصغار، دم ومصابين وجثث نحن الكبار خوّفتنا، ما قادرة اتخيل كانت مرعبة قدر شنو للأطفال ديل».
بعد الناس كترو، قامت مليشيّات الدعم السريع باستهداف البيت. وفي يوم جمعة خشّوا البيت وبقوا يسألوا في الناس: إنتو ومنو؟ وقبيلتكم شنو؟ والحقوا تحقيقاتهم دي بتهديدات بالقتل. بعدّاك، زينب وناس البيت عرفوا إنّهم ما ممكن يقعدوا في الحتّة بتاعتهم دي زيادة.
«طلعنا أنا وأخواتي وأمي ومشينا حي (الزهور) وخلّينا ورانا أخوانا الأولاد، وما بنشوفهم إلا بليل إذا لقينا طريقة نمشي ليهم لغاية اتأكدنا إنهم مشو (أمانة الحكومة)».
في الطريق لحي (الزهور)، عرفت زينب إنّهم خسروا كلّ العندهم، حتّى بيتهم خلاص بقى رماد. في كلّ محطّة بيصلوها، بلاقيهم ارتكاز للدعم السريع وبيستقبلهم بالشتايم والتحرّش الجسدي والتفتيش. السؤال الدائم في لسان المليشيّات دي هو، «وين الرجال المساليت؟»
ما كان في حكومة ولا شرطة ولا إدارة أهلية تقدر تجاوب الأسئلة أو تحميهم من المليشيّات المسلّحة دي. حتّى محاولات الشباب في التسلّح فلشت تمامًا، خلّيك من موضوع الأكل والموية والأدوية. ولمّا جاهم خبر موت والي الجنينة، زينب قالت «ده كان موت لي أملي في إنو الحكومة ممكن تتدخل.» الشي الكويّس الوحيد الحصل إنّو «اخواني الهناك كانوا محظوظين وقدروا يطلعوا ويجونا في (الامتداد)». حتّى كلام كرشوم نائب الوالي المسك زمام الأمور بعدّاك بإنّو الناس ترجع بيوتها ومافي حاجة بتجيهم ما كان كفاية عشان يمنع شكوك الناس. «ولو رجعنا بيوتنا حنموت حنموت. كل حاجة كانت بتحصل قدام عيونا..» وبنهاية الأمل في إنّو يرجعوا لبيتهم وحياتهم القديمة، قالت زينب إنّو «قرّرنا نمشي تشاد زي معظم الناس في الوقت داك».
دي كانت مخاطرة كبيرة، خصوصًا مع المصابين المعاهم، ومصاريف الشارع الما عندهم. شارع ما معروف فيهو شنو مستنّيهم. «اتوكلنا بالفي وبالمافي وبمعجزة وصلنا معسكر (أدري). بعد وصلنا ارتحنا من صوت الرصاص والإشتباكات، دا المكسب الوحيد [لكن] في مقابلو إتشتّتنا. أبوي إتفقد وما عارفينّو حي ولّا ميّت، وأخوي المصاب حالتو ماشة تبقى أخطر».
الوضع في مخيّم (أدري) برضو فيهو معاناة، فتّيش الموية ونقلها عبارة عن تلتلة للاجئين هناك. أغلب الناس بتمشي مسافات طويلة عشان تلقاها، في احتمال كبير برضو ما تتلقي. «الأكل زي الموية قليل لو اتلقى» ومعظم اللاجئين ما عندهم قروش يشتروا بيها حاجات من برّا المخيّم لأنّو «مافي مصادر دخل الناس تسترزق بيها».على الرغم من كلّ المساوئ المرّت بيها زينب إلّا إنّها بتعزّي نفسها «بي إنّو.. حالي أحسن من ناس كتار وإنو في ناس مرت بي تجارب أسوأ وفي ناس خسرت حياتها. عندي تعاطف كبير مع الناس الشايفاهم بيعانوا في المخيم ونفسي اساعدهم لكن العين بصيرة واليد قصيرة. بس ياهو المساعدات الآن في يد منظمات الإغاثة». بالنسبة لزينب هي مؤمنة تمامًا «بالقضاء ودايرة أشوف الناس العملت المجازر والإبادات دي بتتحاسب عليها، وحقّنا يرجع منهم بالقانون. لو الزمن طال هم لازم يتحاسبوا وحقنا لازم يرجع. مافي سلام ولا تنمية ولا إعادة تأهيل ممكن تحصل في غرب دارفور ما لم يتحاسب كل المشاركين في المجازر الفقدنا بي سببها أهلنا وبيوتنا وحياتنا البسيطة».



