حصار وسقوط مورني

معسكر مورني من أكبر معسكرات النازحين في غرب دارفور وبيتبع لي محلية كرينك.  بعد اندلاع حرب دارفور في 2003 و بعد موجة النزوح الأولى في ٢٠٠٤، ناس كتار نزحوا لي مورني واستقروا فيها لغاية ما قامت الحرب في ١٥ أبريل ودخلت مورني في حصار خانق بعد يوم واحد من سقوط الجنينة في ٢٤ أبريل. حصار ضيّق على الناس في مورني عيشتهم وأصاب كل المنطقة بشلل تام بإنعدام المواصلات وقطع الشبكات. في نفس اليوم داك أنزرت مليشيات الجنجويد كل الأهالي إنو عندهم ٧٢ ساعة لإخلاء مورني أو حيتحملوا نتيجة القعاد فيها. وبالفعل نفذوا تهديداتهم ودخلوا مورني بي أنواع مختلفة من الأسلحة الخفيفة والتقيلة. نهبوا وحرقوا كل البيوت، الدكاكين، مستشفى مورني وعدد من العيادات الخاصة. حرائق أظهرت الأقمار الإصطناعية إنها إستمرت لي مدة ٥ أيام. وبعد إنتهوا من نهب وتدمير كل حاجة ممكن تتنهب عملوا سوق صغير وبيقوا يبعوا فيهو كل المواد الغذائية والبضائع النهبوها. “ حتن الموية كانت صعبة شديد ، يعني بنمشي بنجيب موية من الوادي ، الموية الجارية حقت الخريف لأنو اصلا ما كان في مضخات في شرق النيل لكن بكون زحمة لأنو عدد السكان كانو عدد كبير شديد ، ف دي الحاجة الحاصلة ياهو بعداك الجنجويد ذاتو الحاجات الكان سرقوهو من مورني و اللي كان سرقوه من الجنينة بقو برجعو للسوق و قامو فتحو سوق صغير جمب الطرمبة حقت الطريفي و سوق صغير في شرق النيل ، بجو مثلا بدوك شوال سكر تفكي شوال السكر بالقطاعي رطل رطل ، نص نص و بعد يوم او اليوم التاني بجو ياخدو قروشهم و بعداك الربح الفضل بكون ليك انت ، ف بنفس الطريقة ياهو بدو بالسكر و الصابون و الجاز و دي كلها باعتبار انها حاجات مسروقة ، بعداك الناس الباقين بقو بطلعو الحاجات حبة حبة يعني السرير وصل لي 5 الف دي كانت حاجة مبالغة ، سرير سعره وصل 5 الف “

وإجتاحت مورني موجة من الإعتقالات التسعفية مرة بي تهم زي حيازة السلاح وأحيانا تهم بترجع لي سنوات بعيدة. المعتقلين كان بيتم حبسهم في طرمبة الطريفي وفي مجمع الدوحة الخدمي. وما بيتم إطلاق سراحهم إلا بمقابل مادي. 

وبالإضافة للإعتقالات، حكوا ناجين/ات من مورني إنو الحركة بليل أو بالنهار كانت بتعني إما التعرض للتعذيب أو الإغتصاب ودا بيعتمد على كون الشخص المعتقل راجل ولا مرأة. و واحدة من الشهادات أكدت المعلومات دي: 

“يجو بالليل يفتشو على البنات و بمسكوهم بودوهم بغتصبوهم ، اا في كتير حالات حصلت ما حاقوم اذكر بالنيم لكن دي بالذات لي شرق النيل بنات كتار اتعرضو لي اغتصاب من قبل الجنجويد و قدام اهلمهم بمسكوهم بودوهم ، بالاضافة لي بعد الحالات لمن يرجعو مورني المعسكر عشان يشيلو الحاجات المتبقية ليهم ، برضو بتعرضو لي اغتصابات”

الأحداث دي خلت الناس تتهجر من مورني بأعداد كبيرة جدا، بعضهم نزح بالأقدام لي أماكن مجاورة زي نيالا وزالنجي، وأغلبهم لجئوا لغاية تشاد وقعدوا هناك في ظروف إنسانية صعبة.

تدفقات جديدة لناجين من هجمات المليشيات على (مورني) إلى تشاد 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Scroll to Top