وادي كاجا – لا طريق للنجاة

من الأيام الاولى لحصار غرب دارفور والهجوم على الجنينة في ٢٤ أبريل ٢٠٢٣، مواطنين الجنينة والمناطق الحولها وبالأخص سكان أحياء الجنينة الجنوبية واللي غالبيتهم من قبيلة المساليت لقوا نفسهم امام خيارين مافي غيرهم اما يلزموا بيوتهم ويواجهوا مصيرهم المجهول اللي حيكون بيد قوات الدعم السريع ومليشياتو، أو يهربوا لمكان اكثر امان وده برضو لحد كبير خيار مجهول لانو ماعارفين شنو الراجيهم بره في الطريق. الخيارين كانوا محفوفين بالمخاطر فلو قررت تلزم مكانك الموت ممكن يجيك في أي لحظه لو ما في شكل رصاصه ممكن تموت من الجوع والعطش بسبب الحصار والأسواق التم نهبها وحرقها. ولو قلت تمرق نفسك وتشوف مكان ليك ولاسرتك تلجأ ليهو؛ قوات الدعم السريع ومليشياتو “رابطه” ليك في الطريق فلو ما مت بقناصتهم ممكن تموت غرقا في الوديان المليانه موية او تموت من الجوع والعطش برضو. دي المعادلة الاشتركوا فيها كل سكان غرب دارفور وهم في طريقهم للبحث عن ملاذ آمن من انتهاكات وجرائم الدعم السريع والمليشيات المناصرة ليهو. 

لما اشتد الهجوم على أحياء الجنينة الجنوبية في ناس قررت تنزح جوه الجنينة وكانت وجهتهم الأحياء الشمالية وتحديدا منطقة “اردمتا” اللي فيها الحامية ١٥ حقت الجيش، وعلى حسب روايات الشهود الطريق لاردمتا كان عبارة عن جحيم. المليشيات وقوات الدعم السريع كانوا قافلين الشوارع وناصبين كماين للناس الفارين، كانوا بيطلقوا النار على الرجال والنساء والأطفال مع التركيز على الرجال، في حين كانوا النساء بتعرضن لمختلف انواع العنف الجنسي من تحرشات جسدية ولفظية واغتصابات وغيرها. كانوا بيسألوا عن المساليت تحديدا ولو لقوك مسلاتي فأنت حياتك في خطر. 

رحلات اللجوء إلى تشاد بدت من أول الهجوم والحصار في ٢٤ أبريل لاكين في ١٥ يونيو وبعد يوم واحد فقط من حادثة مقتل والي غرب دارفور خميس ابكر على يد قوات الدعم السريع ومليشياته، قررت أعداد كبيرة من المواطنين الهروب لمكان آمن بعد أن استباحت المليشيات مدينة الجنينة بالكامل وارتكبت الفظائع في ظل غياب الحماية للمدنيين وغياب أجهزة الدولة المسؤولة عن توفير الحماية دي. في صباح ١٥ يونيو وبعد اكتر من ٥٠ يوم من الحصار المتواصل حاولت أعداد كبيرة من سكان الجنينة اللجوء الى تشاد باعتبارها أقرب دولة لمدينة الجنينة وبتبعد مسافة ٢٧ كيلومتر فقط. قرار الطلوع من الجنينة للمواطنين كان صعب، و الأصعب كان النجاح في عملية الهروب دي. تعقيدات الطلوع شملت البحث عن وسيلة مواصلات لحدي تشاد، فاضطروا مواطنين الجنينة يدفعوا مبالغ خرافية عشان يلقوا عربية توديهم تشاد، أو يلقوا أفراد من القبايل العربية متعاطفين مع البيمروا بيه القبائل المستهدفة يساعدوهم في عملية الهروب، و الأغلبية العظمى هم الكان ما عندهم الخيارات دي و طلعوا من الجنينة على أرجلهم. 

” احنا ٤ يوم رايحين في الشارع ، نركبو الجبال و ننزل الوادي و نركب الجبال و ننزل الوادي طبعا حتى لحدي الناس جزو من الناس الكانو معانا لقاهم عطش و جوع و طبعا تم أجلهم و توفوا ربنا يرحمهم و احنا برضو يا الله يا الله ياا الله”

  قريب من وادي كاجا البيمروا بيه الناس و هم ماشين على أردمتا، فتحو قوات الدعم السريع و المليشيات المتحالفة معاهم، النار على المواطنين الفارين من جحيم القتال وكان بينهم نساء واطفال، أعداد القتلى غير معروف لحدي هسي والناس النجو من الرصاص العشوائي غرقوا في الوادي على حسب الشهادات. عشان نتأكد من المعلومات دي قابلنا واحد من العاملين في مجال العمل الإنساني وحكي لينا انو: “جماعة من الناس جات من حي الشاطئ وحاولوا الفرار لأردمتا لكن أحد ارتكازات الدعم السريع أطلق عليهم النار والناس القدرت تهرب من إطلاق النار تلقفهم الوادي المليان موية فغرق أغلبهم بما فيهم أطفال ولم يتم التعرف على عددهم حتى الآن”. بحسب التقارير، اتقتل بواسطة الدعم السريع ما يقارب العشرين طفل في المجزرة دي وتم رمي جثثهم في وادي كاجا. 

المعاناة الواجهوها مواطنين غرب دارفور في طريقهم لتشاد حاجه ما ممكن تتوصف من فظاعتها، غير القتل والاختطاف والتعذيب والنهب الاتعرضو ليهو المواطنين الفارين في طريقهم؛ برضو الاعتداءات الجنسية على النساء كانت واحدة من الانتهاكات المتكررة حسب شهادات بعض الناجيات والناجين. بتحكي لينا واحدة من الناجيات القابلناها في معسكر في تشاد انو:”مسكوني، ثبتوني بعداك لقو شنطتي، مافيو حاجة بعداك بقو شنو؟ بدخلوا يدينهم في صدري وبهبشوا فيني وكدا”.  ده طبعا غير حوادث الاغتصاب الواردة في التقارير الرسمية وفي إفادات الشهود. 

من أبريل ٢٠٢: فر ما يقارب ٣٠٠ ألف مواطن ومواطنة سودانية من سكان غرب دارفور الى تشاد، ٩٥% من الفارين من الجنينة لجأوا لدولة تشاد حيث تعتبر الدولة الأقرب للمدينة. واتركز اللاجئين السودانيين في معسكرات شرق تشاد الموجودة أصلا في منطقة أدري، زي معسكر ادري ومعسكرات أنشأت ليهم خصيصا زي معسكر ارونق. وعلى حسب افادة واحد من العاملين في مجال العون الإنساني: “أنا واحد من المناظر المرعبة الشفتها كان ام شايله طفلتها واتعرضت لإطلاق نار متواصل، وما انتبهت انو طفلتها مضروبة إلا بعد دخولها تشاد؛ واكتشفت أنو طفلتها فارقت الحياة وهي شايلاها في ظهرها“. الاتعرضوا ليه مواطني الجنينة و هم طالعين ما كان بس عنده أثر جسدي، و نفسي، و إقتصادي مباشر، بس برضو كان عنده أثر على مستقبل العدالة تجاه الانتهاكات الحصلت. كتار من الشهادات الجمعناها سردت انه تلفوناتهم الكانوا بيوثقوا بيها الإنتهاكات و الأحداث اتنهبت في الطريق من قبل قوات الدعم السريع والمليشيات المتحالفة معاه.

القصة دي بتورينا قدر شنو الجحيم العاشوهو المواطنين اللي فروا من غرب دارفور، وشنو الفظاعات الشافوها واتعرضوا ليها سواء جوه بيوتهم ومعسكراتهم أو في طريق هروبهم للبحث عن مكان آمن، ده غير القصص الماتت مع أصحابها للابد وما ممكن نسمع بيها في يوم من الأيام وما بنقدر نتخيلها.

Leave a Comment

Your email address will not be published. Required fields are marked *

Scroll to Top