لجنة الأمم المتحدة المعنية بحقوق الطفل قالت انو ٢٤ مليون طفل سوداني معرضين لخطر “كارثة عابرة للاجيال”؛ وانو حقوقهم في الحياة والبقاء والحماية والتعليم والصحة والتنمية، كلها تم انتهاكها بسبب الحرب المستمرة في السودان من أبريل ٢٠٢٣. وأشارت اللجنة لانو السودان بيعاني من أكبر أزمة نزوح للأطفال في العالم وانو ملايين الأطفال بيعانوا من سوء التغذية الحاد، والارقام ماشة في تصاعد بسبب عدم امكانية الوصول لخدمات الرعاية الصحية لانو في ٧٠ الى ٨٠ في المية من المستشفيات في السودان اتوقفت عن العمل. ده غير تأكيدات اللجنة انو في زيادة حادة في حالات العنف الجنسي ضد الأطفال، كما انهم اكتر عرضة لخطر انو يتم الاتجار بيهم. اللجنة لفتت الانتباه للتقارير البتفيد بانو طرفي الصراع قاموا بتجنيد المئات من الأطفال في دارفور وشرق السودان، ودعت فورا للتوقف عن تجنيد الأطفال وتجنيبهم تأثير العمليات العسكرية.
بسبب الانتهاكات الجسيمة الحصلت في غرب دارفور بعد ٢٤ أبريل ٢٠٢٣، أعداد كبيرة من الاطفال يقدروا بالآلاف بيعيشوا في ظروف انسانية سيئة جدا، بالاضافة للتقارير البتقول انو في أعداد مقدرة من الأطفال اتقتلوا في الهجمات التمت على غرب دارفور ومدينة الجنينة تحديدا في الشهور الي فاتت. وفي بيان المفوض السامي لحقوق الإنسان الدعى فيهو لفتح تحقيق في شأن وجود مقابر جماعية ل ٨٧ شخص من المساليت واثنيات تانية غير عربية، أفادت التقارير في البيان ده انو من ضمن الجثث الخمسين التم دفنهم في مقبرة جماعية يوم ٢١ يونيو؛ فيها جثث ٧ نساء و٧ أطفال. بالاضافة للنساء، كانوا الأطفال برضو بيضطروا يمشوا يجيبوا الموية من الابار وفي طريقهم بتم استهدافهم من القناصة، وحسب واحدة من شهادات الناجين، في ٣ أو ٤ أطفال تم قتلهم. ما كدا بس، عدد كبير من الأطفال غرقوا في وادي كجا في طريق هروبهم من الجنينة. وفي معسكر ابتنقي في تشاد قابلنا واحدة من الطفلات الناجيات واللي كانت بتسكن في الجنينة حي الجبل مربع ٢ وسألناها شافت شنو في شارعها بتاع اللجوء لتشاد فكانت اجابتها: “في الشارع شفنا الناس الميتين و ناس بضربو بالسكاكين و بي عكاكيز و بفتشو ، شفنا إهانة والله”. ولما سألنا طفل تاني كان ساكن معسكر كرندنق وهسي في مخيم متشي في ادري على الحدود التشادية، سألناهو حسيت بشنو انت واصحابك بعد وصلتو ادري، وده كان ردو: “والله يعني حسينا بالامان كدا ، لانو الضرب مافي و الازعاج مافي ، والا تاني الا تحن ليو الناس الورا اللسه ما جونا ديل، الا همك ليهم هم”. الجدير بالذكر في أكثر من ٣٠٠ ألف شخص عبروا الحدود التشادية من غرب دارفور وهم هسي لاجئين في المعسكرات، وفي معسكر ارونق براهو واللي تم تشييده خصيصا عشان يستوعب اللاجئين السودانيين في ٤٥ ألف شخص، ٨٥% منهم من النساء والأطفال. والأطفال في معسكرات تشاد هم الفئة الأكثر تضررا من الوضع الإنساني السيء، أفادت بعض التقارير بتفشي الأمراض المعدية والأطفال بالاخص بيعانو اكتر حاجه من الملاريا والحصبة، وسُجلت حالات وفيات بسبب سوء التغذية، ده اضافة لانو كل الأطفال الفي تشاد هم خارج صفوف الدراسة. وفي أكتوبر ٢٠٢٣ قالت منظمة اليونيسف انو ٦.٥ مليون طفل سوداني هم خارج نظام التعليم.


