القسيس

بحكم اني درست في كلية اللاهوت في بانت قريب الأربعة سنوات، وبعدها مشيت عملت ماجستير في تنمية الكنيسة والمجتمع في كاليفورنيا، ده أهلني انو اشتغل في كنيسة طيبة الاحامدة في بحري من 1996م لحدي 2014م. طوال الفترة دي كانت الكنيسة بتتعرّض لمضايقات من الحكومة، وفي نهايات سنة 2014م بديت اتعرّض شخصياً لمضايقات وكانت من ناس شغالين في المحلية ومرات في الأمن بيجوا يسألوني أسئلة غريبة، زي مرة واحد سألني انتوا مش شيوخ دين وكده، طيب بتجيبوا القروش حقت الكنيسة دي من وين؟، انا كنت بستغرب شديد من الأسئلة دي ومحتار في انهم دايرين يصلوا لشنو بالضبط. في شهر 8 سنة 2014م جونا في الكنيسة ممثلين للحكومة وأدوني ورقة أوقّع عليها كموافقة لهدم الكنيسة، قالوا انهم حيدونا أرض للكنيسة في مكان تاني بس نحن رفضنا، بعد يومين جات الشرطة ومعاها ناس من المحلية وبدوا يكسّروا في مبنى الكنيسة بالآليات الثقيلة، نحن كنا مصدومين لأنو اصلاً نحن ما وافقنا على تكسير الكنيسة، جيت وقفت قدامهم وقلت ليهم:

منو المسؤول هنا؟

رد لي عسكري ونهرني، وخت لي سلاح في وشي، وقال لي:

مالك يازول داير شنو؟

قلت ليهو:

انا المسؤول من الكنيسة دي وعاوز اشوف ورق ازالة الكنيسة دي. ادوني ورقة بس ما كان موضح فيها أسباب الإزالة، سكان المنطقة الكانوا بيصلو في الكنيسة ناس مساكين واغلبهم نازحين من مناطق كان فيها حروب، ما قدروا يعملوا حاجة وقعدوا يتفرجوا في مكانهم الوحيد بتاع الصلاة والحكومة بتكسر فيهو، بس بعد فترة قصيرة عملنا كنيسة صغيرة في واحد من الميادين عشان الناس تقدر تصلي فيها، لانو الحكومة ما وفرت للناس المساكين ديل بديل، وما ممكن يخلوا صلواتهم عشان ما عندهم مكان صلاة. في يوم من الايام نهايات سنة 2017 جاني تلفون الصباح، اليوم كان جمعة وانا كنت في البيت مع بناتي الاتنين وزوجتي، اتصل علي رقم غريب، لمن رديت قال لي تجينا هسي في مبنى الكنيسة، لمن قلت ليهو انتوا منو، قال لي لمن تجي بتعرفنا ولو ما جيت نحن حنجيك في محلك، جاني احساس انو في شي ما مظبوط وقلقت على زوجتي وبناتي انو لو حصلت لي حاجه منو هيخلي بالو منهم !

لمن وصلت البيت العملناهو كنيسة وهو كان زي بيت صغير كده مبنى بالطين في طرف الميدان، أول ما دخلت لقيت ناس لابسين لبس مدني وشايلين اسلحة، لمن شافوني قالوا لي: ثابت عندك يازول، وشالوا مني تلفوني، ودخلوا جوة المكتب بتاعي في الكنيسة وهو كان عبارة عن غرفة صغيرة فيها كرسي وتربيزة ودولاب، كسروا الدولاب ده وشالوا الكاميرات، وشالوا “آي باد”، وشالوا الكتب، كانوا عاوزين يشيلوا الختم بتاع الكنيسة برضو بس انا قلت ليهم دي الوثيقة الرسمية بتاعة المؤسسة، وبعد اتناقشنا نقاش حار سابوا الختم. رفعوني في العربية وقالوا لي تودينا بيت الأمين العام للكنيسة وبعدها نحن هنرجعك بيتك، وصلنا بيت الأمين العام زي الساعة 9 صباحاً، دخلوا بيتو اعتقلوهو وشالوا منو تلفوناتو وحاجات تانية ماقدرت اعرفها، من هناك اتحركت بينا العربات وكانوا عربيتين الاولى سمعت قالوا ماشين يجيبوا بيها زول من أولاد دارفور ومعاهو شاب تاني قالوا نحن بقيناهو مسيحي، والعربية التانية ساقتنا أنا والقسيس في اتجاه الخرطوم شارع المشتل.

في المعتقل بدو يحققوا معانا، اي زول حققوا معاهو براو، والتحقيق ده استمر من الساعة 3 عصر ولحدي الساعة 1 صباحاً، جوه التحقيق قالوا لي:

 انو انتو جواسيس وفي خواجة مشيتوا لاقيتوهو.

 قلت ليهم:

 انا زول بخدم الكنيسة وبخدم الناس المساكين عن طريق الكنيسة، وطبيعي الاقي خواجات واسافر كم دوله في الشهر، لانو انا قسيس بمشي تبع الكنيسة لانو بتجيني دعوات من الجهات البمشي ليها دي، وما عشان انا زول سياسي، بعدين كيف تقولوا لي انت جاسوس، دي بلدي ما في شي يخليني ابقى جاسوس ضد بلدي. واحد من ناس الأمن أثناء التحقيق اتهمني باني ضابط في الحركة الشعبية، قلت ليو:

انا قسيس وما قاعد امارس عمل سياسي لكين الحزب بتاعي المفضل هو الحركة الشعبية.

 قام قال لي : وليه ما تبقى مؤتمر وطني؟

قلت ليهو: لانو ده حزب إسلامي وانا ما حاسي انو قاعد يمثلني، وانا كمواطن قاعد يتعامل معاي كعدو، بيكسر لي كنيستي عشان انا مسيحي ويبني في محلها جامع، ولو اتكلمت قلت داير حقي ياهو بيعتقلني ويضربني بالطيران.

في واحد من البحققو معاي قال لي:

 ما تدفع 50 الف ونطلعك.

 الوقت داك القروش دي كانت كتيرة ، قلت ليهو:

 انا ما عندي قروش، ولو عندي زاتو ما ح ادفع قروش لانو انا ما مذنب.

قال لي:

انت شكلك ما عاوز تتعاون معانا، ونحن حنوديك المحكمة تتحاكم بإعدام او مؤبد.

التحقيق استمر 3 شهور، وطول فترة التحقيق ما كان مسموح لينا نصلي، بس ياهو كنت شايل معاي إنجيل صغير كدة كنا بنقرأ منو أنا والقسيس، واستخدموا معانا أساليب تعذيب نفسي وإساءات. الخواجة، والزول المن دارفور، والقسيس ديل كانوا محبوسين في كوبر، وأنا كنت محبوس في المشتل في مباني الأمن. بعدها ودونا الاعتراف القضائي، ونفس الأقوال القلناها في التحقيق قلناها في الاعتراف القضائي، ولمن جانا وزير العدل في الوقت داك برضو قلنا ليهو نفس الكلام. قضينا فترة المحاكمات ما بين سجن أم درمان وسجن الهدى، وفترة السجن دي كانت من اسوأ الفترات بالنسبة لي لأنو غير الوضع الكعب جوه السجن والتعامل الما إنساني اللقيناهو، أنا بره خسرت شغلي الخاص، وأسرتي اتشردت وتمت مضايقتهم وكل مرة ناس الأمن جايين ناطين لزوجتي وبناتي في البيت، حتى بناتي بقن متضايقات في شغلهن، وفي النهاية واحدة منهن اضطرت تهاجر برة السودان. في السجن المعاملة كانت قاسية شديد، يعني في اليوم بيطلّعونا كلنا نتمشى الصباح وتاني ما بنطلع الا 6 مساءً، وكنا في زنزانة واحدة كلنا إلا الخواجة كان محبوس براهو، ومرات الزنزانة بتتملي فما عندك خيار غير تنوم نوم الديك في الحبل، تنوم قاعد للصباح، ولا في سراير، لا مراتب، لا مخدات. بس لمن ودونا سجن الهدى الوضع اتصلح شوية، كان في كنيسة كنا بنقعد نعلّم فيها المسيحيين من الصباح ولحدي الساعة 4 عصر، والزنزانة الواحدة كانت بتشيل قريب 200 مسجون، وفيها سراير.

القسيس يدرس في كنيسة سجن الهدى

في الوقت الكنا مسجونين فيهو كان في مجموعة من المحامين متابعين معانا القضية بتاعتنا، منهم محامي كان تابع لمنظمة بتتابع الانتهاكات البتعرضوا ليها المسيحين في جميع الدول، كانوا شغالين متطوعين واتواصلوا مع جهات جوه السودان وبره السودان، عشان نحن نطلع من السجن، وكانوا برعوا أسرنا. المحاكمات استمرت اكتر من 5 شهور، شهور من التعذيب النفسي والتعامل السيء، شهور من الاتهامات الملفّقة والترهيب، شهور من الجوع والعطش وعدم النوم، شهور من القلق والتوتر والخوف على مصير الأسرة، كانت شهور قاسية ومُرّة لدرجة بعيدة. في يوم 2 يناير2018م القاضي نطق الحكم ببراءتي، كانت لحظة فرح ما طبيعي، فرح بإني أخيراً حأقدر أحكي قصتي للناس البره السجن بلساني انا ما بلسان البوليس وناس الامن، واني فعلاً اثبت ليهم اني بريء رغم انو خسرت حاجات كتيرة شديد قصاد اني اطلع من السجن براءة. القسيس حسن وبقيتنا استمرت محاكماتهم 3 جلسات بعد ما انا طلعت من السجن، وبعدها اتحاكم الزول المن دارفور والقسيس بالسجن 11 سنة، والخواجة اتحكم عليهو بالسجن 22 سنة، ودوهم كوبر وبعدها الخواجة جو ساقوهو ممثلين لدولة التشيك. بعد طلعت من السجن الوضع ما اتصلح ويمكن مشى للأسوأ، بعد طلوعي من السجن بشهر بس الحكومة هدمت كنيسة في سوبا، ولمن جا السفير الأمريكي على خلفية الاحداث دي اتناقشت معاهو في الانتهاكات البتحصل للكنائس والمسيحيين بشكل عام، وحكيت ليهو قصة محاكمتنا، وانو لسة القسيس حسن ومعاهو زول تاني مسجونين، وعدني انو حيساعدهم وفعلاً بعد فترة قصيرة القسيس والزول المن دارفور فكوهم من السجن، والقسيس قدموا ليهو لجوء هو واسرته لامريكا، واتعرض عليّ برضو اني امشي امريكا واعيش هناك مع أسرتي بس انا رفضت، لانو حاسي انو دي بلدي ومامفروض امشي اخليها عشان في ناس ماعايزني لأني من جبال النوبة، او لأني مسيحي. .

Scroll to Top