بِت هيبان
في يوم ولادتها قبل سبعتاشر سنه، المطر كان صابي شديد والدايه المفروض تولّدني ما ساكنة معانا في هيبان، وماف اي طريقة نمشي ليها لأنو المسافة المفروض بعيدة ومحتاجين أكتر من يومين عشان نصل منطقة اللقوري، لامن اتضايقت شديد قلت لابوها يرفعني فوق رأس الجبل ويختني تحت شجرة الدليب ويمشي يخليني، في البداية ابوها رفض وقال لي كيف أخليك براك وانتي في حالة وضوع، وحلف قال اصلو ما بيخليني ويا نطلع الجبل سوا ونجي نازلين سوا، يا ما نطلع ونقعد قبلنا. لمن خلاص الوجع ضاق بي وبقيت اكورك بأعلى حسي قلت ليو خلاص ارفعني فوق الجبل بس اقعد بعيد مني، قام قال لي سمح، وطلعنا الجبل، الوقت داك المطرة والرعد شغالين شغل جد، وبتشوف رأس الجبل ده ابيض من شده البرق، والموية نازلة تحت زي السيل، وعشان نحصل فوق تعبنا تعب شديد خلاص، نقوم ونقع لحدي ما حصلنا فوق مع المغيب كده، وكانت الواطا بدت تضلم، وانا جاني وجع الولادة وبقيت احس بيهو في حلقي، مسكت فرع مدلدل من الدليبة والموية النازلة من بين رجليني اتلخبتت مع موية المطر النازلة في ضهر الجبل، وأنا اكورك وانادي في اسامي التسعة وتسعين كجور، وبعد الوجع زاد شديد غبيت والدنيا ضلمت واخر حاجة سمعتها كان صوت صاقعة ضربت قريب مني، انا كنت قايلة روحي مت بس بعد مسافة صحيت لقيت بنيتي صغيرونه راقدة في صدري وماسكه الشطر وبترضع، وابوها واقف فوقنا وبيقول لي: الكجور الكبير هو الولدك وبنيتنا دي باركها الكجور.
ابوها كان فرحان شديد . نزلنا الفريق بعد تلاتة يوم، لانو الكجوري الكبير قال نكمل تلاته يوم فوق راس الجبل وبعد كده ننزل، لمن نزلنا ابوها ضبح تلاته “كواكيرو”، واخواتي عملوا مريسه تلاتة يوم الناس بيشربو منها. ولادة بتي دي التسعة وتسعين جبل اتكلموا عنها، وكانوا بقولوا “بت هيبان” دي، بت الكجور وبعدين لمن تكبر حتعمل حاجات كبيرة ماف زول غيرها بيقدر يعملها، ومن بنيتي دي دخلت بيتنا نحن ما جعنا ولا يوم، والناس بقوا يجونا من بعيد عشان يسلموا علينا انا وابوها ويشوفوها، وكانوا بجيبوا لينا معاهم عيش، وجداد، وسمسم، وعسل، وحاجات كتيرة. بنيتي دي جات نمرة اربعة في عيالنا بعد تلاته اولاد، انا وابوها كنا دايرين بت عشان الماعندو بت في قبيلتنا معناها ما تمام والكجور زعلان منو، عشان كده في عيد الحصاد في السنة ديك، مشينا انا وابوها للكجور الكبير وكلمناهو انو لو زعلان مننا يسامحنا، ولو ما زعلان يدينا بت. بعد عيد الحصاد بشهر انا حملت بيها، وجاني في الحلم ثعبان اب جوهرة نازل من شجرة الدليب الفوق راس الجبل، وقال لي: اديناك بنيتنا اوعك تفرطي فيها، اديناك بنيتنا وبعد تسعة شهور جيبيها لينا فوق رأس الجبل، اديناك بنيتنا اوعك تزعليها عشان ما نزعل منك. انا ما كلمت ابوها بالحلم ده، بس حفظتو جواي وما نسيتو كلو كلو، حتى يوم شالت بندقية ابوها بالدس وهي عمرها عشرة سنة ومشت بيها وراء الجبل، انا ما كلمت ابوها وغطيت ليها عشان ابوها كان ممكن يدقها وانا عارفة ده بزعل الكجور.
لمن كبرت بنيتي كان بتضرب سلاح احسن من اخوانها، وبتسرح بالبهايم وتمشي بيهم لحدي اللقوري وتجي راجعة براها، لدرجة اخوانها الاولاد كانوا بيغيروا منها وبقولوا لي: يا امي اختنا دي كيف تمشي براها لحدي اللقوري وتجي راجعه ونحن اخوانها قاعدين، الكلام ده ما بجي يا امي. كنت بقول ليهم يا وليداتي اختكم دي عوجة بتجيها مافي، اختكم دي الكجور حاميها و هي حاميانا كلنا. لحدي ما في يوم من الايام هي مشت اللقوري تجيب حاجات ل عيد الحصاد، وكان الكجور طالب حاجات يعملوها ليو عشان بنيتي تمت سبعتاشر سنه، وده عمرها بتاع العرس عشان كدة لازم الكجور يباركها عشان يجيها عريس يكون زول قوي وشجاع والكجور رضيان عنو، المرة دي اتاخرت شديد ونحن هنا قلقنا عليها واخوانها قالوا إلا يمشو يلحقوها، بس انا منعتهم وقلت ليهم اختكم حتجي شيلوا الصبر. في النفس اليوم ده بالليل هجموا علينا جيش كافي طيارة، كانوا راكبين تاتشرات فيها دوشكات، وشايلين بندقيات، كانوا زي كم وتلاتين عربية وكلهم عندهم سلاح، وجونا من جهة الجبال وبدوا يضربوا ذخيرة من طرف، واي زول وقف في شارعهم ضربوا طلقة، ابوها شال سلاحوا وطلع ليهم بره قدام القطية، وقال ليهم شبر من بيتي ما بتقربوا الا اكون انا ميت، ما انتظروهوا كمل كلامو وفتحوا فيهو الدوشكا، قطعوهو حته حته ولحمو جاني طاير جوه القطيه، انا ناديت الكجور وناديت التسعة وتسعين جبل، ناديت بنيتي ماتجي راجعه هيبان، وليداتي كانوا فوق راس الجبل ما جو نازلين وماعرفت مشوا وين، اخواتي ورجالهم وعيالهم كلهم كتلوهم.
كافي طيار وقف في نص هيبان وقال: انا الله بتاعكم الليلة، والعندو راي تاني يفتح خشمو عشان اديو طلقة. وليداتي جرو، وجرو، ما حصلوا اللقوري، واللقوري بقت أبعد من دار صباح، وليداتي اخبارهم اتقطعت بعد كم يوم، وبنيتي ما جات راجعة، وانا ما كتلوني لكين شغلوني تحت عساكر كافي طيار، اغسل ليهم هدومهم، واصفي ليهم المريسة، ومرات يسكرو ويطلعو فيني بالليل، سته شهور وانا شغالة تحتهم بالغصب عشان مايكتلوني، ستة شهور وانا راجية بنيتي تظهر. في يوم من الايام الدنيا صيف، وعرق الناس ينقط، فجأة صبت مطرة من غير سحابة، مطرة لونها اغبش زي المريسة، بس طعمها زي الدم، يومين المطرة دي صابه وعساكر كافي طياره بدو يغرقوا، السيل جا نازل من فوق الجبل، و”شلال كلبي” غرق هيبان كلها، في صباح اليوم التالت ظهر في السماء ثعبان كبير شديد بجناحين.
ثعبان في نص راسو جوهرة بتشوفها زي البرق في السماء، لمن رك الثعبان ده في رأس الجبل نزل من ضهرو زول عيونو حمر زي الجمر، ولونو اسود زي الفحم، وشايل في يدو بندقية، الزول ده كان عريان من بعيد، لمن نزل من الجبل ظهرت ليهو شطور وشعرو وقف فوق راسو زي القطية، عساكر كافي غرقانين في الدم وبيكوركو بصوت عالي، والموية نازلة من رأس الجبل شلالات من الدم، والزول نازل من الجبل وفي يدو بندقية، لمن وصل قصاد كافي طياره اللي كان غرقان في دمو، صرخ بصوت ما مسموع: أنت الله بتاعهم؟
رد ليهو الزول الشايل البندقية: لا لا انا بت هيبان.
