حفلة الدم

انا فنانة من مدينة نيالا وبسبب غناي عملت جمهور كبير في نيالا وضواحيها، وجمهوري بحبني جداً وده واضح في طلبات الحفلات الكثيرة البتجيني بشكل مستمر. اها مرة مشينا عندنا حفلتين في تلس  واللهي محلية من محليات نيالا، بعد مشينا عملنا الحفلتين  وجايين راجعين كنا انا واختي ومعاي  عازف وفني ساوند وفنان – قريب العريس – وإتحركنا حوالي الساعه 7ص من تلس وماشين كويس لحدي وصلنا منطقه اسمها بطيخة، وفي نص الطريق زي الساعه 12 و نص النهار قابلونا ناس النهب المسلح؛ ثبتونا ونهبو كل حاجاتنا وبعدها دخلونا طرف الشارع بطحوا كل الاولاد في الأرض وفي نفس الزمن قتلوا قريب العريس؛ وبعدها  ساقونا قدام مسافه قريب ساعه جوه غابه، قعٌدوا البنات بإتجاه والأولاد بإتجاه ونحن كنا زي تسعة نفر، كان بجازوا في الأولاد وهم مبطوحين في الأرض وبجلدوا فيهم بغبن  وبجبروهم لازم يقولوا انهم من قبيلة الفلاتة لانو الواضح انو دي تصفية لانو الوقت داك كان في مشاكل قبلية. نحن  البنات ما سألونا لحدي ما تلفوني رن وانا لابساهو في رقبتي، كان في عربيه تانية كانت معانا وطلعت قدامنا بس شكلهم لما وصلوا نيالا الساعه 3 مساء فقدونا وقاموا اتصلوا في تلفوني ؛ اها اول ما تلفوني رن ناس النهب هاجوا وضربوني ضرب شديد بالبندقية وعوقوني في يدي وضهري واساءوا لي اساءات كعبة شديد، بعدها قلعوا  مني التلفون. رجعوا للشباب ديل واصلوا يعذبوا فيهم  للمغرب وبعداك شالوا توبي وشرطوهو وربطونا، وجازوا العازف كتييير شديد لحدي الساعه 6 مساء بدوا يضبحوهو قام  واحد منهم قال ليهم وقفوا ما تضبحوهو، شويه كده تلفونهم رن ونحن سمعنا جزء من المكالمة؛ الزول المتصل قال ليهم اطلعوا الزمن فات وسأل قتلتوهم قالوا ليهو لا ما قتلناهم، قال ليهم خلوهم المحل دا لانو مقطوع حيموتوا جوع وعطش ومافي زول حينقذهم. بعد مشوا مسافة دقيقه جو راجعين كلهم ضربوا العازف لحدي مات بعداك مشوا.

بعد اتأكدنا انهم مشوا واحد من الشباب المعانا فك التاني بخشمو وبعداك فكينا بعض ومشينا خلينا المرحوم في محلو، هم قتلوا اتنين مننا الاول في البدايه والتاني دا جوه الغابه؛ اها مشينا مسافه قريب ساعة سمعنا زول بقطع في شجر قمنا مشينا عليهو بحالنا ديك، قال لينا  انا سامع الزخيره لكن م قايل ديل النهب المسلح، المهم ادانا دقيق بسكر شربنا وادانا شاي وطلع لينا الشوك من رجولنا وبعدها ادانا تلفونو اتصلنا نيالا وناس نيالا اتصلو لتلس، شرطه تلس اتصلت لي شرطه محلية كتيلة فجونا بالاسعاف وودونا كتيلة وبعدها ودوا المراحيم تلس؛ في نفس اليوم جانا الوالي اتكلم معانا وجا عمدة تلس برضو اتكلم معانا. فتحنا بلاغ  بإسمي، بعدها طلع قرار من قائد الدعم السريع في المنطقة انو خلال اربعه وعشرين ساعه تجي العربيه  وفعلا  لقوا العربية في محلية مرشنج والسواق مقتول في العربيه، وعندنا ساوند صاحبنا ما لقيناه بس  قبضوا تلاته أنفار عارضين الساوند للبيع ولسه اجراءات القضية شغاله بس ببطء شديد لكن الحصل لي ده انا مصدومه منو لحدي الان وعمري ما حأنساهو لامن اموت.

Scroll to Top