القناص
أسوأ حاجة ممكن تحصل ليك هي انك تكون حاضر حادثة مقتل طالب زيك، كان بيقاسمك نفس المكان في اللحظة ديك، ونفس الهموم والمعاناة، وحنجرتو كانت بتردد معاك نفس الهتافات. والأسوأ من كدة ان تقيف عاجز في اللحظة الانضرب فيها رصاصة في صدرو وماتقدر تحميهو ولا تقدر تنقذو، وبعد داك المغصة تقرب تكتلك بسبب انك ماقادر توصل الكاتل للعدالة مع انو معروف. أنا وأغلب الطلاب الحضروا معاي الحادثة دي اتعرضنا لضغوط ماطبيعية من أهلنا عشان نسيب الموضوع ده، ومانمشي الوقفات الاحتجاجية ولا أي نشاط عندو علاقة بالحادثة، ده غير التهديدات الكانت بتجينا من جهات مجهولة عشان يخوفونا ومانقول شهادتنا. أبو الشهيد كان بيقول لينا: لو وجودكم حيمنعني أشيل حق ولدي أرجوكم أبعدوا من الموضوع ده وخلوني أجيب ليهو حقو، بس في نفس الوقت أم الشهيد كانت متمسكة بوجودنا لأننا كنا موجوعين وهي حاسه بوجعتنا ودايره دم ولدها، ولي يوم الليلة بتقول: ”دم ولدي ده دم كل طالب من جبال النوبة، وأي طالب سوداني شايل دم ولدي في رقبتو لحدي مايرجع ليهو حقو ويتحاكموا الناس الكتلوه.“
في الفترة الحصلت فيها الحادثة مليشيات النظام السابق وكتائب الظل جوه الجامعات كانوا بيصنفوا الطلاب وبيستهدفوهم على حسب المناطق الجايين منها، يعني انت جاي من النيل الأزرق أو جبال النوبة معناها انت حركة شعبية، ولو انت جاي من دارفور معناها يا إما انت عدل ومساواة او يو بي اف وحركات تحرير، لدرجة انو حتى الروابط الثقافية والاجتماعية كان بيتم تصنيفها على انها حركات مسلحة. أنا في اول يوم جيت فيهو الجامعة وكنت برلومة جديدة صادف انو كان في ركن نقاش لليو بي اف والكيزان جو هاجموا الركن ، اتضربت وماكنت بعرف ولا زول وماعارفة انو في رابطة اسمها رابطة جبال النوبة أساساً، الولد الجا طلعني من الجامعة قال لي: اطلعي لانو ممكن تنضربي عشان انتي سودا، وفعلاً اتضربت عشان لوني اسود بس.
في أبريل 2016م كان معانا في الرابطة طالب كفيف، وكان من الناس المعروفين في الجامعة الأهلية وسط الطلبة لأنو زول فنان شديد بيغني وبيعزف ايقاع. اليوم ده صادف انو في ركن نقاش لليو بي اف والطالب ده كان قاعد في الجامعة وأثناء ما الركن ده شغال كتائب الظل من الطلاب هاجموا الركن بالسيخ والسواطير وبدوا يضربوا أي زول خصوصاً لو كان زول أسود من جبال النوبة أو دارفور، الناس اتفرقت وبدت تطلع من الجامعة وكتير من الطلاب اتصابوا والركن اتفرتق، في اللحظة ديك فضل الطالب الكفيف ده بس لأنو زميلو الكان ماسكو وعاوز يطلعو من الجامعة اتضرب، في اللحظة ديك جو اثنين من كتائب الظل جارين عليه لما وصلوهو واحد منهم قال للتاني لا ماتضربو انت مش عارف انو ده فلان وزول كفيف ومسالم وكده، فداك رد ليهو قال ليهو: يعني شنو مش هو عب أسود يتضرب بس.
الشهيد وقتها كان طالب في الأهلية في سنه تانية، ونحن كرابطة 27 كان المفروض يكون عندنا رد فعل تجاه الموقف ده، قمنا طلعنا بيان رفضنا فيهو الموقف الحصل ده ووصف الطالب ده بانو أسود والعنصرية الحصلت تجاهو وحاولنا نسلم البيان ده لاتحاد طلاب الجامعة الأهلية واللي هم معروفين كيزان، وعملنا مخاطبة بس تمت مهاجمتنا بالسواطير واتضربنا من كتائب ظل الكيزان. مرقنا من الجامعة والشهيد كان معانا وكان بيحاول يطلعنا عشان الموضوع ينتهي وماف زول فينا تحصل ليهو حاجة كعبة او يتأذي لأنو كان بيعرفهم كوز كوز. بعد طلعنا من الجامعة ووصلنا مقابر حمد النيل كان في قناص مرتكز فوق في راس واحد من المباني قريب من بوابة الجامعة، وكان مستهدف الطلبة القدام وخصوصاً طلبة جبال النوبة، وكانوا في واحدين من كتائب الظل بيضربوا فينا بالملتوف وبيسيئوا لينا وبيقولوا بصوت عالي: “أضرب العب واكتلو”، ونحن في مقابر حمد النيل اتضربت رصاصة جات في صدر الشهيد وقريبة من القلب وعلى بال مايسعفوهو اتوفى، والشباب الاتنين الكانوا معاهو اعتقلوهم.
الخبر انتشر في الواتساب انو في طالب من جبال النوبة اتكتل وده الجانب الصاح من القصة، بس الكيزان كانوا دايرين يعكسوا انو الحصل ده كان مشكلة مابين طلاب جبال النوبة وطلاب دارفور عشان يخلقوا فتنة، بس الكويس ان الوسط الطلابي كان واعي بانو دي خساسة كيزان. في الزمن داك الجثمان كان في مشرحة أم درمان الداخلية وهم كانوا رافضين يسلمونا الجثمان وعملوا جوطة، بس نحن كطلاب كنا حاشدين من كل الجامعات والتيارات السياسية. لما طلع التقرير الأول للطب العدلي طلع بأن الشهيد اتكتل بسلاح ابيض، بس نحن رفضنا التقرير وضغطنا وغيرنا الدكتور وبعد داك طلع التقرير بانو اتضرب بطلق ناري عن طريق قناص وكانت الطلقة قاصدة القلب لقرب المسافة بينها وبين القلب، التقرير كان منصف والطبيب صورو ورفعوا في الميديا. بعدها هدّدوا والد الشهيد وقالوا ليهو: الطلبة ديل حيعملوا بلبلة ورفضوا يسلمونا الجثمان لكن نحن رفضنا وأصرينا أنو لازم نستلمو وأثناء احتجاجنا ده تم اعتقال اتنين من الطلاب الكانو قايدين الحِراك. بعد استلمنا الجثمان اتحركنا على مقابر حمد النيل وبعد داك مشينا بيت أم الشهيد في الإصلاح وطول الطريق نحن رافعين الجثمان وبنهتف “مقتل طالب مقتل امة، مقتل طالب يعني الثورة”، وبعد داك شيّعنا الجثمان إلى مثواه الأخير في مقابر حمد النيل، والحناجر ما سكتت من ترديد الهتافات.
لمن كانوا بيستجوبونا ويسألونا عن الزول الضرب الشهيد كلنا كنا بنقول انو ده الزول الكان شايل سلاح وموجهو على الطلبة، وهو معروف في الجامعة انو من أكبر كوادر الكيزان وكان بيعرف الشهيد حق المعرفة لأنهم بيلعبوا سوا في فريق الجامعة بتاع الكورة وإسمو عبد الله. بعد داك حرّكنا البلاغ بس سمعنا انو الكاتل رحّلوه بره السودان، وبدت تجي رسائل تهديد لأسرة الشهيد بأنو لازم يسيبوا التصعيد ده ويقبلوا بالديّة. قبل ليلة من رمضان سنة 2016م عملنا تأبين للشهيد ومؤتمر صحفي في دار حزب الأمة وتم فيهو اعتقال كل طلبة جبال النوبة الحضروا التأبين، وبرضو تم اعتقال الباشمهندس سمير الأمين العام لحزب الأمة واستجوابه أكتر من مرة. بعد عملنا المؤتمر الصحفي والجامعة فتحت سلمنا مذكرة لإدارة الجامعة بضرورة تسليم كاتل الشهيد للعدالة، بس واجهنا معاكسات في انو نخش الجامعة مع أننا كنا عاملين وقفة احتجاجية سلمية ومقتل الشهيد مرت عليه مدة طويلة ولسة الكاتل ما اتسلّم للعدالة.ولسة الكاتل ما اتسلّم للعدالة. بعد فترة البلاغ اتشطب بس الشهيد كان عندو خالتو كنا متابعين معاها وبنمشي الوقفات الاحتجاجية سوا، والبلاغ بيتعلّق وتاني بيرجع يستأنف، ومرات بيقولوا البلاغ ضد مجهول. في الفترة ديك المجتمع المدني زاتو كان مضغوط وماكانوا بيناصرونا بشكل مباشر، لكن كانت في الأجيال الواعية بحقوق الإنسان والمناصرة حاولوا يدونا مفاتيح نقدر نحل بيها القضية ونحقق بيها العدالة، بس للأسف لحدي هسي ما قدرنا نجيب حق الشهيد تمبش ولحدي مانجيب ليهو العدالة ويتحاكموا الناس الكتلوهو حيطاردنا كلام أم الشهيد لمن قالت:
“دم ولدي هو دم أي طالب من جبال النوبة، واي طالبه وطالب سوداني شايلين دم تمبش ولدي في رقبتو”.
