من 2003 و 2008 النساء في دارفور إتعرضن لاستهداف ممنهج بسبب إنتمائاتن القبلية وتقاطعها مع نوعهن الإجتماعي.
بعد التاريخ الطويل دا من إستخدام الإغتصاب كسلاح حرب، ومحاولات حكومة الإنقاذ لتعتيم كل الجرائم البيرتكبها الجيش هناك، رجعت قوات الدعم السريع لإستخدام نفس المنهج حسب شهادات الناجيات من الانتهاكات الحصلت في 24 أبريل.
ذكرت وحدة مكافحة العنف ضد المرأة إنو تم تسجيل 21 حالة اعتداء جنسي في الجنينة، لكن شهادات الناجيات من الانتهاكات أكدت إنو إختطاف البنات، اغتصابهن والمضايقات الجنسية كانت بتحصل بشكل متكرر كل يوم بجانب إنتهاكات تانية زي التعنيف بالضرب والإهانة.
من المهم فهم السياق الخاص بالنساء في غرب دارفور وكيف الحرب بتأثر عليهن بشكل مضاعف. في كل حوداث القتل الحصلت هناك، إتعرضت عشرات النساء لي القتل والتعذيب برضو، وفي كل الحرايق والإصابات إتفرضت عليهن أعمال رعائية شاقة في وقت كانت فيهو المستشفيات بتتحرق وبيتم إستهداف الكوادر الطبية.
بجانب الأطفال، كان عليهن يشيلن كبار السن والمصابين على أكتافهن خلال كل موجات النزوح الداخلي ولغاية الوصول لي تشاد. الأكل، الموية والأمان جزء من المسؤوليات الإتفرضت عليهن بموجب الحرب. ومحاولة توفير الحاجات دي في جغرافية غرب دارفور – المحاصرة من قبل المليشيات والدعم السريع – بتعني تعريض حياتهن للخطر وأجسادهن للإغتصاب. لأنو فعليا ما كان في أكل الوقت داك، وعشان يجيبن الموية إلا يمشن مسافات بعيدة بليل وأحيانا ما بتتلقي ويمكن يتصابن برصاص القناصات البتنتشر في سطوح البيوت والمباني.
حكايات الناجيات في مخيم أدري إتفقت على إنو الوضع كان كارثي لأي بنت وإمرأة في دارفور، بليل بيجوا المسلحين ويطلبوا بنات وبالنهار بتتم مضايقتهن في الإرتكازات ونقاط التفتيش بي حجج إنهن بيهربن الأسلحة للرجال. في نفس الإرتكازات دي بيتم نهب المجوهرات والممتلكات وأي مقاومة بتعني التعرض للضرب والأذى اللفظي والجسدي بصورة متكررة.
الوصول لي تشاد بيعني النجاة من الموت وبيعني وصول أعباء من نوع جديد. الخيم ورواكيب القش في أدري والمخيمات التانية في تشاد شايلة أكتر من سعتها بكتير، مافي حمامات ومافي فوط صحية ولا إحتياجات الأمهات الحوامل والمرضعات بالإضافة للعنف الجسدي البلاحقهن، سواء كان داخل المعسكر، أو في مكان عملهم، واحدة من الناجيات بتحكي في مقابلة:
“هسا انا ممكن مشيت اقرب سوق مشيت دايرة نفرش ، المحل الصغير ممكن انا ختيت فيو سكريتي و كدا اطلع رزق يومي هم بجو انو بحاولو بمنعوني بقول لي الا تحاولي تدفعي ضريبة و كدا و انت لو مثلا حاولت تشرح ليهم انو انت الظرف ما بسمح ليك و كدا هم بحاولو بمنعوك بشتتو ليك حاجاتك و بدفقو و بدقوك ، عادي عندهم الحاجة دي يعني الحاجة دي”
الإغتصابات، الموت، الجوع، فقدان الأقارب والأطفال، ضياع الممتلكات والتشتت.. كلها كانت -ولا زالت- بتنزل على النساء في غرب دارفور وبتهدد حياتهن، أمانهن وصحتهن الجسدية والنفسية.
حرب أعنف على أجساد السودانيات


