بدأت محليات وقرى غرب دارفور كلها تتآكل بالنيران، إبتداء من سقوط وحرائق الجنينة ومورني ومستري لغاية وصلت مولي ومجمري وجوكور. ووصلت سربا بالضبط يوم ٢٤ يوليو ٢٠٢٣.
محلية سربا بتقع شمال الجنينة ٧٤ كيلومتر من تشاد. دخلت المليشيات على سربا بي مواتر، وتاتشرات وبكاسي. دخول مرتبط عند الناس في غرب دارفور بالموت. واتوقفت أصوات الحياة فعلا وبقى ما بيتسمع في شوارع سربا غير صوت الرصاص وبكاء الأطفال والصراخ. الناس القدروا يطلعوا حكوا عن إنو في أطفال ونساء ماتوا في الهجوم على الأحياء والمراكز الصحية وبعدها إتحولت سربا من منطقة سكنية فيها مدارس ومراكز صحية وبيوت لي مسرح جرائم كبيرة وكتيرة زي الهجمات العشوائية، النهب والحرق، وكانت بتحصل بشكل منهجي ومنظم.
صور الأقمار الإصطناعية أظهرت إنو تصاعد الدخان من منطقة سربا إستمر لأيام كتيرة، وشهادات الناجين والناجيات ورونا إنو وتيرة الفوضى إستمرت بنفس الطريقة لحد ما بقى ماف خيارات قدام الناس غير إنهم يطلعوا من سربا ويتجهوا نحو تشاد في رحلة موحشة وبرضو ما بتضمن البقاء…


