نزل حزام البنطلون

يوم 3 أغسطس زي الساعة 9 صباحا كان عندي مشكلة في ضبط جهاز الريسيفر والطبق وكنت بفتش على مهندس عشان يصلحهم لي، قمت اتواصلت مع واحد من الشباب وهو قام وصف لي واحد مشيت ليهو في بيتهم وما لقيته في النهاية اتصلت عليهو واتفق معاي انو يجيني بعد الفطور؛ بعدها رجعت بيتنا شلت قروش الرغيف وماشي على الفرن لقيت واحد من الشباب سألني ماشي وين وريتو طوالي قال لي بمشي معاك الفرن؛ اها اثناء ما انا والشاب دا ماشين ظهرت عربية لاندكروزر بدون لوحات وراكبين فيها افراد مسلحين نادوا ياشاب واشروا علي، قمت مشيت ليهم وسلمت عليهم قاموا نزلوا طوالي وقالوا للشاب المعاي انت امشي؛ انا في البداية كنت مفتكرهم عايزين يسألوا عن وصف ولا حاجة بس من قالوا للشاب المعاي امشي انا شكيت فيهم وطوالي قلت ليهم الحاصل شنو؟، قاموا بدوا يضربوا فيني وثلاثة منهم كانوا محاوطيني من كل الاتجاهات قالوا لي ارفع يدينك فوق، قلت ليهم انا ما مجرم عشان ارفع يديني فوق؛ لما الضرب كتر علي رفعت يديني، بدوا يفتشوني في جيوبي وفي صلبي لمن جروا الحزام بنطلوني نزل، طوالي قالوا لي حنغتصبك الليلة؛ وأثناء الضرب ده في واحدة جارتنا فتحت باب بيتها عاوزة تطلع طوالي جدعوني في عربيتهم ومشينا؛ اتحركنا ودخلنا شوراع داخلية وانا كنت من كثرة الضرب ما مستوعب حاجة.

وصلنا في محل خور كبير واحد منهم اتكلم قال لي زميلو هسي ناس النفير بتاع المقابر ديل شغالين شنو، انا طوالي عرفت انو نحنا وين بالضبط لكن بعداك دخلونا بشارع ضيق ونزلوني، انا قمت سالتهم الحاصل شنو وانتوا منو؟، قالوا لي انت عسكري؟، قلت ليهم لا في واحد قال لي نحن المباحث وعايزين نأدبك، قلت ليهم لو انتوا جهات حكومية وروني شنو السبب الخلاكم تعملوا معاي كده، قاموا كتفوني وبقوا يضربوا فيني؛ بعد وقفوا الضرب نزلوا واتوزعوا في بيوت السكر قائد التيم قال ليهم كلبشوا الولد دا مايجري، قلت ليهو ما النجري انا عملت شنو عشان نجري؛ لحدي هنا ما كان في أي استجواب قمت انا قلت ليهم بدل تضربوني كدا والمسألة دي تصفية دقوني رصاص طوالي، قالوا لي انت ماشفت حاجة دا بسيط انت راجيك اكتر من كدا ونبذوني نبذ بذيء، قائد التيم سألني اسمك منو وشغال شنو؟ قلت ليهو طالما ما عارفني انا منو وشغال شنو مالكم ماسكني؟، وبعداك وريتهم اسمي وشغال وين، قام قائد التيم قال لي الليلة بنفصلك من الشغل؛ قلت ليهو طوالي افصلني وأثناء ما نحنا ماشين على وزارة التخطيط العمراني قال لي يلا نحن حنغتصبك، بعدها دخلنا الوزارة ذي اقل من دقيقة كده وطلعنا، هم كانوا عايزين يخوفوني طوالي مشوا بالسوق رفعوا زي حكاية ثلاثة أطفال مشردين أعمارهم ما بين 10- 13سنه، وكانوا بضربوا فيهم ضرب شديد؛ انا اتاثرت وقلت ليهم ديل اطفال ما تعذبوهم كدا، قالوا لي انت راجيك اكتر اصبر بس، ودونا بشارع حي الكرانك ودي كانت اول لي مرة اعرف انو عندهم مقر تاني لما قريت اللافته مكتوب فيها مقر المباحث ولايه وسط دارفور، وطبعا كنت مكلبش قالوا لي انزل قلت ليهم زي ما رفعتوني نزلوني، طوالي فكوا لي يديني ونزلت؛ لمن دخلونا لقيت مجموعة من الشباب وكان في بت برضو ولقيت اخوي منتظرني هناك لانو صحبي والناس الشافوني مشوا كلموا ناس بيتنا.

دخلت مبنى المباحث عشان اعرف الحاصل شنو، في ضابط قاعد جوه قال لي مشكلتك شنو؟، قلت ليهو تم اختطافي وضربي وتم تهديدي بالاغتصاب ودا ما اسلوب يليق بيكم كجهات حكومية؛ قال لي اطلع برا وطلع واحد منهم قال الا يحلقني صلعة انا طوالي اشتبكت معاهو وقلت ليهو ما بتحلقني، قام واحد من الأفراد المعاهم اتدخل وحلاني منو. بعداك قاموا قسمونا جزء مننا قالوا ليهم امشوا والباقي قعدوهم ومن ضمنهم انا، اشروا علي وقالوا دا ما يطلع خليه يقعد؛ اها وانا قاعد كدا جاء واحد قال لي انت تعال، قمت مشيت معاهو قال لي انت بتتشاف زول مثقف و واعي نحنا مسكناك لانك قاعد مع زول بتاع مخدرات ونحن هسي عايزنك تنسى الحصل دا، قلت ليهم انتوا لو انا كنت قاعد مع بتاع مخدرات ليه ما مسكتوهو؟، وانا اصلاً ما بتعاطى أي حاجة، المهم انا ما بخليكم وبفتح بلاغ؛ بعد قلت ليهم كدة طوالي هددوني بالاغتصاب وبي أسرتي. بعد طلعوني مشيت فتحت بلاغ ورجعت البيت؛ ومن يوم فتحت البلاغ ده بقيت مراقب وسببوا لاسرتي خوف وقلق؛ ودايماً بتجيني منهم تهديدات بانهم ممكن يلفقوا لي تهمة لو ما سحبت البلاغ، وانهم ما يسيبوا القضية تتحرك إجراءاتها وفعلاً انا من فتحت البلاغ القضية دي ما مشت قدام ولا خطوة؛ لانو كنت تعبان شديد من الضرب الاتضربتو مشيت نيالا عملت فحوصات، واتضح انو بسبب الضرب الاتضربته في رأسي حصلت لي مشكلة في النظر، وبقيت ما بشوف الا البس نظارة؛ البلاغ لسة مفتوح بس لا انا ولا اسرتي ما حاسين بالامان ولا عارفين ممكن يحصل لينا شنو.

Scroll to Top